विवाह उद्योगाचा आकार १० लाख कोटी! शिक्षणावरील खर्चाच्या तुलनेत लग्नांसाठी होतोय दुप्पट खर्च

वृत्तसंस्था, नवी दिल्ली : भारतीय नागरिक खाद्यपदार्थ आणि किराणा माल या खर्चानंतर सर्वाधिक खर्च विवाहावर करतात. त्याचप्रमाणे शिक्षणावर केल्या जाणाऱ्या खर्चाच्या दुप्पट खर्च विवाहांवर केला जातो. यामुळे देशातील विवाह उद्योगाचा आकार सध्या सुमारे १० लाख कोटी रुपयांवर किंवा १३०अब्ज डॉलरवर पोहोचला आहे. हे निरीक्षण ब्रोकरेज संस्था जेफरीजने ताज्या अहवालात नोंदवले आहे.

वस्तूवापर (कन्झम्पशन) या गटाचा विचार करता, विवाह हा दुसरा मोठा गट आहे. रिटेल उद्योगातील गटांमध्ये सांगायचे झाल्यास सर्वात मोठा गट हा खाद्यपदार्थ व किराणा मालाचा असून त्याचा आकार ६८१ अब्ज डॉलरचा आहे. त्यानंतर विवाह उद्योगाचा क्रमांक लागत असून हा उद्योग सध्या १३० अब्ज डॉलरचा झाला आहे. पूर्वप्राथमिक ते पदवी पर्यंतच्या शिक्षणावरील खर्चाचा आढावा घेतल्यास भारतीय माणूस विवाहावर सरासरी दुप्पट खर्च करतो. त्याचवेळी अमेरिकेत शिक्षणावर केल्या जाणाऱ्या खर्चाच्या ५० टक्के कमी खर्च विवाहावर केला जातो.

विवाहांची वार्षिक सरासरी संख्या
देश विवाह
भारत ८० लाख ते एक कोटी
चीन ७० ते ८० लाख
अमेरिका २० ते २५ लाख