Refrigerator life span : तुमचा फ्रिजही झालाय का ‘इतका’ जुना; असाच वापरल्यास घरात होईल स्फोट

फ्रीज ही आता प्रत्येक घरात गरजेची गोष्ट आहे. बरेचजण आपले किचन सजविण्यासाठी नवनवीन अपडेट असलेले फ्रीज घेत असतात. पण काही लोक असे असतात की, त्यांनी एकदा फ्रीज विकत घेतला की तोच फ्रीज ते १५ ते २० वर्षे चालू ठेवतात. बऱ्याच लोकांना हे माहित नसते की रेफ्रिजरेटरचेही काही आयुष्य असते. जोपर्यंत फ्रीज चालवून तुम्हाला कोणतेही नुकसान होत नाही तोपर्यंत त्याचे आयुषय आहे समजावे. फ्रीज खूप जुना झाला तर एखादेवेळी फ्रीजचा स्फोट होऊ शकतो.अशा परिस्थितीत फ्रिज लाइफ स्पॅन म्हणजे काय आणि फ्रीज खरेदी केल्यानंतर तुम्ही तो किती वर्षांसाठी वापरू शकता हे जाणून घेणे महत्त्वाचे आहे. रेफ्रिजरेटरचे आयुर्मान हे रेफ्रिजरेटरची क्वालिटी, ब्रँड आणि मेंटेनन्स यासारख्या अनेक गोष्टींवर अवलंबून असते.

तुमच्या रेफ्रिजरेटरचे काय आहे वय

सामान्यत: एक रेफ्रिजरेटर 10 ते 15 वर्षे टिकू शकतो, परंतु सुरक्षितता लक्षात घेऊन, रेफ्रिजरेटर 10 ते 12 वर्षांच्या दरम्यान बदलले पाहिजे. जर तुमचा रेफ्रिजरेटर 10 वर्षांपेक्षा जुना असेल, तर तो वापरतांना काळजी घ्या कारण अशावेळी कॉम्प्रेसर आणि इतर इलेक्ट्रिकल भाग खराब होण्याची शक्यता वाढते, ज्यामुळे शॉर्ट सर्किट किंवा स्फोट होण्याचा धोका वाढू शकतो.

ब्रँडेड कंपन्यांचे रेफ्रिजरेटर टिकतात जास्त काळ

याशिवाय रेफ्रिजरेटरची क्वालिटीही खूप महत्त्वाचीआहे, ब्रँडेड कंपन्यांचे रेफ्रिजरेटर स्थानिक ब्रँडपेक्षा जास्त काळ टिकतात. याशिवाय, रेफ्रिजरेटरची योग्य देखभाल करणे देखील महत्त्वाचे आहे. फ्रीजची नियमित सर्व्हिसिंग करा आणि फ्रीज डीफ्रॉस्ट करत राहा, मग तुमचा फ्रीज तुम्हाला दीर्घकाळ साथ देईल.

रेफ्रिजरेटर जुना झाल्यावर दिसतात ‘ही’ चिन्हे

विजेचा वापर

नवीन तंत्रज्ञान असलेल्या रेफ्रिजरेटरच्या तुलनेत, 15 किंवा 20 वर्षे जुने रेफ्रिजरेटर अधिक वीज वापरण्यास सुरवात करतात.

थंड करणे

जर फ्रीजचे काही भाग चांगले काम करत असतील परंतु काही भाग व्यवस्थित थंड होत नसतील आणि तुमचा फ्रीज 15 किंवा 20 वर्षांपेक्षा जुना असेल तर याचा अर्थ फ्रीज बदलण्याची वेळ आली आहे.

वारंवार बिघाड

फ्रीजचा कंप्रेसर आणि गॅस गळती यासारख्या गोष्टी वारंवार होत असतील, तर अशावेळी नवीन फ्रीज घेण्यापेक्षा दुरुस्तीचा खर्च जास्त असू शकतो.

जर तुम्हाला वर नमूद केलेल्यापैकी कोणतीही चिन्हे जाणवत असतील तर याचा अर्थ असा आहे की, तुमचा जुना रेफ्रिजरेटर बदलण्याची वेळ आली आहे आणि तुम्ही नवीन रेफ्रिजरेटर घेण्याचा विचार केला पाहिजे. या गोष्टी लक्षात घेतल्यास तुम्ही तुमचे घर सुरक्षित ठेवू शकता आणि संभाव्य दुर्घटना टाळू शकता.