उद्धव ठाकरेंच्या ताफ्यावर शेण अन् बांगड्या फेकल्या
विधानसभेच्या तोंडावर राज ठाकरे आणि उद्धव ठाकरे यांच्यातील वाद उफाळून आला आहे. राज ठाकरे यांच्या मराठवाडातील दौऱ्यादरम्यान ठाकरे गटाने राज ठाकरे यांच्या ताफ्यावर सुपारी फेकत आंदोलन केले. या घटनेने मनसैनिक संतापले आणि त्यांनी यांचं प्रत्युत्तर देत उद्धव ठाकरेंच्या ताफ्यावर शेण आणि बांगड्या फेकल्या. त्यानंतर पोलिसांनी मनसैनिकांना ताब्यात घेतलं. पोलिस ठाण्यात मनसैनिक असताना मनसे अध्यक्ष राज ठाकरे यांनी व्हिडिओ कॉल करून मनसैनिकांशी संवाद साधला. तेव्हा मनसैनिकांनी पोलिस ठाण्यातच जल्लोष साजरा केला.
राज ठाकरेंचा व्हिडिओ कॉल, मनसैनिकांचा पोलिस ठाण्यात जल्लोष
उद्धव ठाकरे गटाच्या मेळाव्यात मनसेचे ५० ते ६० कार्यकर्ते घुसल्याने त्याठिकाणी मोठा तणाव निर्माण झाला. या कार्यकर्त्यांमध्ये महिलांची सख्या अधिक होती. त्यानंतर शिवसैनिक आणि मनसैनिक आमनेसामने आल्याने मोठा गोंधळ निर्माण झाला. मनसैनिकांनी ठाकरेंच्या ताफ्यावर शेण आणि बांगड्या फेकल्या. या घटनेनंतर पोलिसांनी मनसैनिकांना ताब्यात घेतलं. त्यांच्यावर गुन्हाही दाखल करण्यात आला.
मनसैनिकांना पोलीस ठाण्यात आणण्यात आलं. त्यावेळी महिला कार्यकर्त्यांनी थेट राज ठाकरेंना व्हिडिओ कॉल केला. राज ठाकरेंनीही व्हिडिओ कॉल घेतला आणि मनसैनिकांशी संवाद साधला. यावेळी राज ठाकरेंनी व्हिडिओ कॉल घेताच कार्यकर्त्यांनी पोलीस ठाण्यातच जल्लोष केला.
मराठवाडा येथील दौऱ्यादरम्यान शिवसैनिकांनी राज ठाकरे यांच्या ताफ्यासमोर सुपाऱ्या टाकल्या होत्या. हे मनसेच्या जिव्हारी लागलं. राज ठाकरेंनीही यावर संतप्त प्रतिक्रिया देत, माझ्या नादी लागू नका, नाहीतर कार्यकर्त्यांचं मोहोळ उठलं तर सभाही होऊ देणार नाही, असा थेट इशारा दिला होता. त्यानंतर ठाण्यात तेच घडलं. मनसैनिकांनी ठाकरे गटाला प्रत्युत्तर दिलं.