हिट अँड रनचा हा संपूर्ण प्रकार असून अपघात झाल्यानंतर कारचालक घटनास्थळावरून फरार झाला आहे. या भीषण अपघातात दुचाकीस्वाराचा मृत्यू झाला असून सागर गजानन पाटील (वय २७) असे मृत दुचाकीस्वार तरुणाचे नाव आहे.
भरधाव स्कॉर्पिओची समोरुन दुचाकीला धडक, तरुण दुरवर फेकला गेला
२७ वर्षांचा तरुण सागर पाटील हा हेरिटेज फूड प्रॉडक्ट या कंपनीत कामाला होता. आपली ड्युटी संपवून तो त्याच्या दुचाकीवरून घरी परतत होता. याचदरम्यान मनोरनजीक हात नदी लगत असलेल्या गणेशघाट परिसरात समोरून आलेल्या भरधाव स्कॉर्पिओ कारने दुचाकीला जोरदार धडक दिली. यात दुचाकीसह दुचाकीस्वार सागर दूरवर फेकला गेला. या अपघातात दुचाकीस्वार सागर पाटील याचा जागीच मृत्यू झाला आहे.
तर, अपघात झाल्यानंतर कारचालक अपघातात जखमी झालेल्या सागरची कोणतीही मदत न करता घटनास्थळावरून पसार झाला. या घटनेची माहिती मिळताच मनोर पोलीस तात्काळ घटनास्थळी दाखल झाले. घटनास्थळाचा पंचनामा करून त्यांनी सागरचा मृतदेह ताब्यात घेत मृतदेह शवविच्छेदनासाठी रुग्णालयात पाठवण्यात.
वाहन चालकाला अटक
या अपघात प्रकरणात मनोर पोलीस ठाण्यात हिट अँड रनचा गुन्हा दाखल करण्यात आला आहे. याप्रकरणी पोलिसांनी तातडीने कारवाई करत तपासाला सुरुवात केली. मुंबई- अहमदाबाद राष्ट्रीय महामार्गावरील हॉटेलच्या पार्किंगमधून अपघाताला कारणीभूत असलेली पांढऱ्या रंगाची स्कॉर्पिओ कार पोलिसांनी हस्तगत केली आहे. पहाटेच्या सुमारास आरोपी कारचालक सचिन सुरवसे (वय ३२) ताब्यात घेण्यात आले आहे. कारचालकाची वैद्यकीय चाचणी करण्यात आली असून अधिक तपास मनोर पोलीस करीत आहेत. पण, या कारचालकाच्या बेजबाबदारपणामुळे एका घरचा आधार हिरावला गेला आहे.