नेमके काय घडले
संतप्त जमावाकडून सांगण्यात येत आहे की, अनिश चव्हाण नामक कर्मचारी नेहमीप्रमाणे कामावरुन सुटून आपल्या घरी जात होता. पण अचानक तो घरी जात असताना चक्कर येऊन पडला, डोक्याला मार लागला म्हणून तो सेंट जॉर्ज रुग्णालयातच उपचारासाठी गेला, परंतु वरिष्ठ डॉक्टर नसल्याने त्याला दोन ते अडीच तास उपचार मिळाले नाही. फिट आल्याने अनिशचा जागीच मृत्यू झाला. यावेळी स्थानिक लोकांनी आणि नातेवाईकांनी हॉस्पिटलमध्ये मोठी गर्दी केली. रुग्णालयात उपचारासाठी डॉक्टर नसल्याने अनिशचा मृत्यू झाला असा आरोप नातेवाईकांनी केला आहे. यावेळी पोलीस प्रशासनांना माहिती मिळताच त्यांनी नागरिकांना आणि नातेवाईकांना शांततेचे आवाहन केले आहे.
विधानसभा अध्यक्ष राहुल नार्वेकर पोहचले रुग्णालयात
सेंट जॉर्ज रुग्णालयातील बातमी कळताच विधानसभा अध्यक्ष राहुल नार्वेकर तातडीने रुग्णालयात संतप्त जमावाच्या भेटीसाठी पोहचले. जे दोषी आहे त्यांच्यावरती सकाळपर्यंत कारवाई केली जाईल अशा विश्वास नार्वेकरांनी नातेवाईकांना दिला आहे. मी आलो तेव्हा देखील RMO इथं नव्हते, सेंट जॉर्ज रुग्णालय घटनेत तातडीने कारवाई करण्यात येईल, दोन डॉक्टरांवर निलंबनाची कारवाई सुद्धा केली आहे असे नार्वेकर म्हणाले.
याच प्रकरणात उद्या दुपारी १२ वाजता विधीमंडळात विधानसभा अध्यक्ष राहुल नार्वेकर यांच्या अध्यक्षतेखाली बैठक घेण्यात येणार आहे. वैद्यकीय शिक्षण मंत्री हसन मुश्रीफ आणि महत्त्वाचे अधिकारी उपस्थित राहतील. रुग्णालयातील सीसीटीव्ही फुटेज तपासून कठोर कारवाई करण्याचे पोलिसांना आदेश दिले आहेत असे नार्वेकर म्हणालेत.