स्वप्नील कुसळेने पॅरिसमध्ये ५० मीटर रायफल थ्री पोझिशनमध्ये कांस्यपदक जिंकून दिले होते. पॅरिसमधून आज भारतात परतलेल्या स्वप्नीलचे पुणे विमानतळावर जंगी स्वागत झाले. त्यानंतर त्याने श्रीमंत दगडूशेठ हलवाई गणपतीचे दर्शन घेतले आणि आरती केली. पत्रकारांशी बोलताना स्वप्नील म्हणाला, मला खुप भारी वाटत आहे की,हा मान मला मिळाला. तब्बल ७२ वर्षानंतर मी पदक जिंकून दिले. या प्रवासात सगळ्यांनी मला खूप पाठिंबा दिला आणि मदत केली. मला जो पाठिंबा मिळाला त्यामुळेच हे पदक जिंकता आले.
पदक जिंकून मायदेशात परतल्यानंतर सर्वप्रथम मला बाप्पांचे दर्शन घ्यायचे होते. हे माझे घर आहे आणि मला आनंद होतोय की माझ्या घरात अशा पद्धतीने स्वागत झाले. नेमबाजीतील या प्रकारात मला वेगळेपण दिसले. त्यामुळे मी याची निवड केली होती आणि हळूहळू त्यात यशस्वी होत आहे.
विनेश फोगटबद्दल म्हणाला…
एक खेळाडू म्हणून मी समजू शकतो की विनेशला काय वाटत असेल. तिच्या सोबत जे काही झाले त्याचे मलाही वाईट वाटते, असे स्वप्नीलने म्हटले. महिलांच्या कुस्तीत अंतिम फेरीत पोहोचून इतिहास घडवणाऱ्या विनेशला अतिरिक्त वजनामुळे अपात्र करण्यात आले होते.
स्वप्नीलने यावेळी राज्य सरकारने खेळाडूंना आणि खेळासाठी चागंल्या सुविधा द्याव्यात अशी अपेक्षा व्यक्त केली. त्याच बरोबर माझे स्वप्न इथेच संपले नाही तर मला देशासाठी अजून पदक जिंकून द्यायचे आहे. आता पदक जिंकले याचा आनंद आहे पण आता गोल्ड जिंकायचे आहे असे तो म्हणाला.