त्याचे झाले असे की, आमदार किशोर दराडे पुण्यातील बाजीवर रस्त्यावरून जात होते. परंतु भरपूर वाहतूक कोंडी झाल्याने तिथून लवकर निघता यावे यासाठी आमदार महोदयांच्या चालकाने सायरन वाजविण्यास सुरूवात केली. अवास्तव सायरनचा आवाज ऐकल्यानंतर लागलीच थोड्याफार प्रमाणात गाड्यांची हालचाल सुरू झाली. बेकायदा वाहतूक नियमांचे उल्लंघन होत असल्याचे पाहून एका पुणेकर नागरिकाने आमदार दराडे यांच्या कारला गाठले.
दुचाकीवरील नागरिकाला काहीतरी बोलायचे आहे हे पाहून आमदारांनी गाडीची काच खाली घेतली. तोपर्यंच चालक सावध झाला होता. त्याने घाईघाईतच सीट बेल्ट लावला. त्यावर पुणेकर नागरिकाने चालकाला चांगलेच सुनावले. आम्ही जनता यांना निवडून देतो तेव्हा ते आमदार आहेत. पोलिसांकडे पाहू नको, असे सांगत त्याने आपला संताप व्यक्त केला. हा सगळा किशोर दराडे किलकिल्या डोळ्यांनी पाहत होते. आपलीच चूक असल्याने ते एकही शब्द बोलू शकले नाहीत.
कोण आहेत किशोर दराडे?
मागील महिन्यांतच पार पडलेल्या नाशिक शिक्षक विधान परिषद मतदारसंघाच्या निवडणुकीत शिंदे गटाचे किशोर शिंदे विजयी झाले. किशोर दराडे यांनी प्रतिस्पर्धी अपक्ष उमेदवार विवेक कोल्हे यांचा पराभव केला. शिवसेना ठाकरे गटाचे उमेदवार ॲड. संदीप गुळवे यांना तिसऱ्या क्रमांकावर समाधान मानावे लागले. शिक्षण संस्थांचे तसेच शिक्षणाविषयीचे प्रश्न, शिक्षकांच्या मागण्या याविषयी आमदार किशोर दराडे सातत्याने पाठपुरावा करत असल्याने आणि शिक्षण क्षेत्रातील समस्यांची सर्वांगीण जाण असल्याची ख्याती आहे.
याआधी झालेल्या निवडणुकीत उद्धव ठाकरे यांनी किशोर दराडे यांना नाशिक शिक्षक मतदारसंघातून उमेदवारी दिली होती. टीडीएफ संघटनेचे अधिकृत तसेच शिवसेना पुरस्कृत म्हणून ते निवडणुकीला सामोरे गेले होते. २०१८ साली झालेल्या निवडणुकीत त्यांनी विजय संपादन केला होता.