अमरावती : शहरातील अकोली-म्हाडा कॉलनी मार्गावरील स्मशानभूमीसमोरील झाडाझुडुपात गुरुवार, २८ नोव्हेंबर रोजी दुपारी २ वाजताच्या सुमारास नागरिकांना शिर नसलेला मृतदेह आढळून आला. त्यामुळे परिसरात एकच खळबळ उडाली. मृतकाची ओळख अद्याप पटली नसून या प्रकरणी खोलापुरी गेट पोलिसांनी अज्ञाताविरुद्ध खुनाचा गुन्हा दाखल केला. अज्ञात आरोपीने सदर अनोळखी व्यक्तीच्या गळ्यावर धारदार शस्त्राने वार करून त्याचे शिर धडावेगळे केले. धड घटनास्थळीच फेकून देत शिर इतरत्र फेकले असावे, असा अंदाज पोलिसांनी व्यक्त केला आहे. मृतकाची ओळख पटविण्यासाठी पोलिसांनी धडापासून वेगळे केलेल्या शिराचा युद्धपातळीवर शोध चालविला आहे. मृतकाचे वय ४० ते ४५ वर्षे असावे, असा अंदाज वर्तविण्यात आला आहे. अकोली-म्हाडा कॉलनी मार्गावरील एका शेताच्या कुंपणापासून आत जाणाऱ्या पाऊलवाटे शेजारी एकाचा मृतदेह शिराविना आहे, अशी माहिती पोलिसांना मिळाली. या माहितीच्या आधारे खोलापुरी गेटचे ठाणेदार गौतम पाठारे हे आपल्या पथकासह घटनास्थळी दाखल झाले. याबाबत माहिती मिळाल्यावर पोलीस उपायुक्त गणेश शिंदे, साहाय्यक पोलीस आयुक्त जयदत्त भंवर, गुन्हे शाखेचे पोलीस निरीक्षक गोरखनाथजाधव व सीमा दाताळकर, सीआययुचे साहाय्यक पोलीस निरीक्षक महेंद्र इंगळे यांनीसुद्धा घटनास्थळ गाठून पाहणी केली. खोलापुरी गेट पोलिसांनी परिसरात पाहणी केल्यावर रक्ताने माखलेला सत्तूर, दोन वेगवेगळ्या ठिकाणी पडलेला चपलेचा जोड व चष्मा आढळून आला. मृतकाच्या अंगावर शर्ट व पायजामा असे कपडे आहेत. घटनेचे गांभीर्य लक्षात घेता श्वानपथक व ठसे तज्ज्ञांनासुद्धा पाचारण करण्यात आले. श्वानपथकाने परिसरातील देशी दारू दुकानापर्यंत धाव घेतली. घटनास्थळी नागरिकांनी एकच गर्दी केली होती. या गुन्ह्याचा उलगडा करण्यासाठी पोलिसांनी युद्धपातळीवर मृतकाची ओळख पटविण्यासाठी प्रयत्न सुरू केले असून, शिरसुद्धा शोधले जात आहे. धडापासून वेगळे केलेले शिर आरोपीने कुठे फेकले असावे, त्या सर्व शक्यता लक्षात घेऊन पोलिसांनी शोधमोहिम सुरू केली आहे. सोबतच, परिसरातील नागरिकांना देखील विचारणा केली जात आहे. हरविलेल्या व्यक्तींची नोंदसुद्धा तपासण्यात येत आहे.