Bhandup School Case: भांडुपच्या नामांकित शाळेतील तीन मुलींसोबत गैरवर्तन झाल्याची संतापजनक माहिती समोर आली आहे. याप्रकरणी पोलिसांनी लिफ्ट मेकॅनिकला अटक केली आहे.
मुंबईच्या भांडुपच्या येथील एका नामांकित शाळेत १०-११ वर्षांच्या ३ विद्यार्थिनींसोबत गैरवर्तन करण्यात आले आहे. शाळेच्या लिफ्ट मेकॅनिकने मुलींसोबत गैरवर्तन केल्याची संतापजनक माहिती आहे. याप्रकरणी पालकांच्या तक्रारीनंतर पोलिसांनी पोक्सो कायद्यांतर्गत आरोपी लिफ्ट मॅकेनिकवर गुन्हा दाखल करत त्याला अटक केली आहे.
पालकांच्या दबावानंतर शाळेनेही लिफ्ट मेकॅनिकविरोधात कारवाई केल्याची माहिती आहे. या लिफ्ट मेकॅनिकने शाळेतील १० ते ११ वर्षांच्या तीन अल्पवयीन मुलींसोबत गैरवर्तन केल्याचा आरोप आहे.
मुलीने शिक्षकांकडे तक्रार केल्यानंतर घटनेचा उलगडा
ही एक नामांकित इंटरनॅशनल शाळा आहे. या शाळेत तीन मुलींसोबत गैरवर्तन करण्यात आलं आहे. २७ नोव्हेंबरला ही घटना घडल्याची माहिती आहे. सकाळी १० ते दुपारी दीड या काळात मुली शाळेत होत्या. त्या योग करत होत्या. त्यादरम्यान, शाळेच्या इमारतीच्या बेसमेंटमध्ये लिफ्ट मेन्टेनंन्सचा कर्मचारी होता तो मुलींकडे गेला आणि त्यांची छेड काढली.
त्यानंतर या मुलींनी शाळेतील शिक्षकांकडे याची तक्रार केली. त्यानंतर शाळेतील सीसीटीव्ही तपासण्यात आला. तेव्हा हा लिफ्ट मेकॅनिक मुलींशी गैरवर्तणूक करताना आढळून आला. त्याने तीन मुलींसोबत गैरवर्तन केल्याचं समोर आलं होतं. तो मुलींकडे बघून अश्लील खूणा करतानाही दिसला.
Mumbai News: भांडुपमध्ये ‘बदलापूर’! शाळेत तीन चिमुकलींसोबत गैरवर्तन, अश्लील खूणा, लिफ्ट मेकॅनिकला अटक
त्यानंतर शिक्षकांनी या आरोपीला पकडून ठेवलं आणि पोलिसांना याबाबतची माहिती दिली. त्यानंतर पोलिसांनी आरोपीला अटक केली. आरोपी मुळचा ओदिशाचा असल्याची माहिती आहे. सध्या या प्रकरणात पुढील कारवाई सुरु असून या घटनेने पीडित मुलींना मोठा धक्का बसला आहे.