विधानसभेच्या निवडणुकीत भाजपा सर्वात मोठा पक्ष ठरला आहे. महायुतीला सरळ बहुमत मिळाल्यानंतर शपथविधी 5 डिसेंबर रोजी होणार आहे. पंतप्रधान नरेंद्र मोदी यांच्या उपस्थितीमध्ये शपथविधी सोहळा पार पडणार आहे. आता कोणाच्या गळ्यात मंत्रीपदाची माळ पडते हे पाहण्यासारखे ठरणार आहे.
शपथविधी सोहळ्यात अजित पवार हे उपमुख्यमंत्रीपदाची शपथ घेतील हे स्पष्ट आहे. आता राष्ट्रवादीच्या संभाव्य मंत्रिमंडळाची यादी पुढे येताना दिसतंय. छगन भुजबळ, धनंजय मुंडे, आदिती तटकरे यांचे मंत्रीपदे कायम राहणार आहेत. नरहरी झिरवाळ, संजय बनसोडे, संग्राम जगताप, सुनील शेळके, इंद्रनील नाईक, दत्ता भरणे, अनिल पाटील यांचीही नावे मंत्रीपदासाठी चर्चेत आहेत. अजित पवार यांच्याकडे अर्थ खाते असण्याची शक्यता आहे.
सुनील शेळके यांनी मावळमधून निवडणूक लढवली. मोठ्या मत्ताधिक्याने ते निवडून आले. सुनील शेळके आणि संग्राम जगताप यांची मंत्रीपदावर वर्णी लागू शकते, अशी चर्चा आहे. सुनील शेळके यांनी अनेक वर्ष भाजपा युवा मोर्चामध्ये काम केले. त्यांनी विधानसभेची निवडणूक ही राष्ट्रवादीकडून लढवली. यासोबतच अजून काही नावे मंत्रीपदासाठी चर्चेत असल्याचे बघायला मिळतंय. भाजपाकडूनही अनेकजण मंत्रीपदासाठी इच्छुक आहेत.