How To Cut Peepal Tree: तुम्ही एक गोष्ट पाहिली असेल की छतावर, घरासमोर किंवा घरासमोरील पायरीवर, पाईपमध्ये पिंपळाचे झाड उगवते. आता पिंपळाचे झाड म्हणजे त्याची पूजा केली जाते त्यामुळे पिंपळाचे झाड उगवले की घरातले खास करून जेष्ठ नागरिक टेन्शनमध्ये येतात, आता हे तोडायचे कसे? किंवा हे तोडले तर आपल्यावर देवाचा कोप होईल. अशा परिस्थितीत अजिबात घाबरू नका, ज्योतिष शास्त्रात पिंपळाचे झाड तोडण्याचे नियम दिले आहेत. या नियमांनुसार काही विशिष्ट परिस्थितींमध्येच पिंपळ कापणे योग्य आहे. चला पाहूया ते नियम काय आहेत.
अंगणात पिंपळाचे झाड उगवले काय करावे?
एक गोष्ट लक्षात ठेवा तुम्ही घराच्या आसपास उगवलेले पिंपळाचे झाडं कापत असाल तर १० रोपांची लागवड करून त्यांची काळजी घ्यायला हवी. एक हजार पानांपेक्षा कमी पाने असणारे पिंपळाचे झाड कापले तर दोष लागत नाही. घरातील टाकी, छत किंवा पाईपमध्ये उगवलेल्या पिंपळाच्या रोपाला तोडले तर दोष लागत नाही किंवा कोणताही त्रास होत नाही, पण अंगणात पिंपळाचे झाड उगवले आणि ते कापायचे असेल तर काही नियम पाळणे आवश्यक आहे.
पिंपळाच्या झाडाला तोडायचे नियम
जर पिंपळ किंवा कोणतेही झाडं कापावे लागले तर आदल्या दिवशी रात्री एक दिवा लावून त्याला नैवेद्य दाखवून अशी प्रार्थना करा की, ‘या पिंपळाच्या झाडावर जर कोणत्या देवता निवास करत असतील तर त्यांनी आपले स्थान दुसऱ्या ठिकाणी जावे, आमचा हेतू तुम्हाला त्रास देण्याचा नाही.’ त्यानंतर 108 वेळा विष्णु सहस्त्रनाम किंवा 108 वेळा गजेन्द्र मोक्ष जप करावा.
यांची मदत घेतली तर काम होईल सोपे
ज्योतीषशास्त्रात असे सांगतिले आहे की पिंपळाचे झाड काढायचे असेल तर कुमारिका, हत्ती किंवा बैल यांची मदत घ्यायला हवी. याचा अर्थ असा आहे की हत्ती, बैल किंवा कुमारिका यांचा थोडासा स्पर्श किंवा त्यांनी थोडे बल पिंपळाच्या झाडाला लावायला हवे. म्हणजे ते पिंपळाचे रोप दुसऱ्या ठिकाणी लावता येईल. समजा पिंपळाचे रोप किंवा झाड कापायचे असेल तर कुऱ्हाडीला तूप किंवा मध लावायला हवा.
कापलेल्या पिंपळाचे काय करावे?
कापलेल्या पिंपळाचे लाकूड स्मशान किंवा हवनाच्या ठिकाणी दान करु शकता. पिंपळ कापल्यानंतर त्याची पाने पडतात ती पाने हत्ती किंवा बैलाला खायला द्या त्यामुळे कोणताही दोष लागत नाही. एक झाडं तोडल्यानंतर १० झाडे लावण्याचा आणि त्याची जोपासना करण्याचा प्रयत्न करा. फक्त पिंपळाचे नाही तर सर्वच झाडे महत्त्वाची आहेत. लक्षात ठेवा झाडे म्हणजे जीवन, ती मानवासाठी खूप महत्त्वाची आहे. त्यामुळे तुम्ही काही कारणाने एखादे झाड तोडले तर त्याबदल्यात १० झाडे लावण्याचा नक्की प्रयत्न करा म्हणजे तुम्हाला दोष लागत नाही असे सांगितले जाते.