दादर रेल्वे स्थानकाच्या फलाट क्रमांक ११ वर आरपीएफ जवान संतोषकुमार रामराज यादव रविवारी रात्री नेहमीप्रमाणे गस्त घालत होते. कोकणात जाणारी तुतारी एक्स्प्रेस फलाटावर लागली होती. एक मोठी ट्रॉली बॅग घेऊन दोन तरुण ट्रेनमध्ये बसण्याचा प्रयत्न करीत होते. दोघे असूनही त्यांना ही बॅग उचलली जात नसल्याचे यादव यांच्या लक्षात आले. त्यांनी पुढे जाऊन बॅग तपासली असता रक्ताचे थेंब आढळले. त्यांनी दोघांना बॅग उघडण्यास सांगितले असता दोघांपैकी एकाने पळ काढला. बॅग उघडताच आतमध्ये एका तरुणाचा मृतदेह आढळला.
यादव यांनी रेल्वे पोलिसांना याबाबतची माहिती देताच पोलिसांनी घटनास्थळी धाव घेतले. पोलिसांनी हत्येचा गुन्हा दाखल केला आणि ताब्यात असलेल्या तरुणाची चौकशी केली. चौकशीमध्ये जय चावडा असे नाव ताब्यात घेतलेल्या तरुणाने सांगितले. त्याने मित्र शिवजित सिंग यांच्या मदतीने अर्शद याची हत्या पायधुनी येथे केल्याचे सांगितले.
दादर रेल्वे पोलिसांनी हत्येचा गुन्हा दाखल करून पुढील तपासाकरिता पायधुनी येथे वर्ग केला. पोलिसांनी जय याने दिलेली माहिती आणि तांत्रिक पुराव्यांच्या आधारे शिवजित याला उल्हासनगर येथून अटक केली. जय, शिवजित आणि अर्शद हे तिघेही मुकबधिर असून एकमेकांचे मित्र आहेत.
रविवारी रात्री क्षुल्लक कारणावरून दोघांचा अर्शदसोबत वाद झाला. रागाच्या भरात दोघांनी हातोड्याने अर्शदला डोक्यात मारले. यात त्याचा मृत्यू झाला. मृतदेहाची विल्हेवाट लावण्यासाठी दोघांनी एक मोठी बॅग घेतली आणि तुतारी एक्सप्रेसने जाऊन फेकण्याचा त्यांचा कट होता असे चौकशीतून समोर आले आहे.