आरोपी अक्षयच्या कुटुंबाची मागणी
अक्षय शिंदेच्या कुटुंबियांनी पोलीस ठाण्यात जाऊन तक्रार दाखल केली आहे की, त्यांना मारहाण करण्यात आली आहे. त्याचबरोबर त्यांनी अक्षयची पुन्हा मेडिकल चाचणी करण्याची मागणी केली आहे. त्यांच्या मते या चाचणीद्वारे आपल्या मुलाचा म्हणजे अक्षयच्या निर्दोषतेचा पुरावा मिळू शकतो.
अक्षयची आई काय म्हणाली?
अक्षयची आई म्हणाली, अक्षयला १५ दिवस झाले कामाला लागून, १३ तारखेला घटना घडली. अक्षयला १७ तारखेला घेऊन गेले. आम्हाला तिथल्या काम करणाऱ्या बाईने सांगितलं की, अक्षयला पोलीस घेऊन गेले. तेवढंच मला माहिती आहे. पोलीस माझ्या मुलाला मारु लागले, माझ्या लहान मुलाला पण मारलं. असं आरोपी अक्षयच्या आईने सांगितलं आहे.
अक्षय शिंदेच्या घराची तोडफोड
बुधवारी बदलापूरमध्ये अक्षय शिंदे राहत असलेल्या खरवई गावातील ग्रामस्थ आक्रमक झाले. अक्षय शिंदे खरवईपासून काही अंतरावर असलेल्या एका चाळीत राहतो. गावातील ग्रामस्थांनी बुधवारी त्याच्या घरात घुसून कुटुंबीयांना बाहेर काढलं आणि घरातील सामानाची तोडफोड केली. त्यानंतर गावकऱ्यांनी अक्षय शिंदे याच्या कुटुंबीयांना घरातून हाकलून लावत गाव सोडण्यास भाग पाडले.
अक्षयच्या घरात सापडली खेळणी
दरम्यान, आता एक मोठी माहिती समोर आली आहे. ग्रामस्थांनी अक्षय शिंदे याच्या घरावर हल्ला चढवला तेव्हा त्याच्या घरात लहान मुलांची खेळणी आढळली आहेत. ही खेळणी नेमकी आली कुठून? असा सवाल आता उपस्थित झाला आहे. याबाबत एसआयटी पथकाकडून तपास केला जाण्याची शक्यता आहे.