Satara MLA Jaykumar Gore Convoy car Accident: माण-खटावचे आमदार जयकुमार गोरे यांच्या ताफ्यातील स्कार्पिओ गाडीने दोन जणांना चिरडल्याची घटना घडली आहे. सकाळी नऊच्या सुमारास दहिवडीजवळ शेरेवाडी फाटा येथे हा अपघात घडला आहे. अपघात एवढा भीषण होता की, दोघांचा जागीच मृत्यू झाला आहे.
वृत्तानुसार, आमदार जयकुमार गोरे यांच्या ताफ्यातील स्कार्पिओ गाडी दहिवडीनजीकच्या शेरेवाडी फाटा येथून जात असताना एका स्कूटीला जोरदार धडक दिली. यामध्ये ३० वर्षीय विवाहित रणजीत मगर आणि २५ वर्षीय अनिकेत मगर यांचा मृत्यू झाला आहे. अनिकेत व रणजीत दोघेही शेरेवाडी फाट्याहून बिदालच्या दिशेने स्कुटीवरुन निघाले होते. यादरम्यान आमदार जयकुमार गोरे यांच्या ताफ्यातील स्कार्पिओ देखील भरधाव वेगात दहिवडीच्या दिशेने जात होती. यावेळी शेरेवाडी फाटा येथे स्कार्पिओ चालकाचे गाडीवरील नियंत्रण सुटल्याने हा अपघात घडला आहे. त्यावेळी समोरून स्कुटीवरून येणाऱ्या रणजीत व अनिकेतला चिरडून स्कॉर्पिओ ५० मीटर अंतरावर पुढे गेली. यामध्ये अनिकेत व रणजीत दोघे गंभीर जखमी झाले. एकाचा जागेवरच मृत्यू झाला तर दुसऱ्याचा रुग्णालयात दाखल केले असता उपचारादरम्यान त्याचा मृत्यू झाला आहे.
घटनेत आमदार जयकुमार गोरे यांच्या ताफ्यातील स्कार्पिओ गाडीचा चालकही गंभीर जखमी झाला आहे. त्याला देखील उपचारासाठी रुग्णालयात दाखल केले आहे. दहिवडी पोलीस घटनेचा पुढील तपास करत आहेत.
अंबरनाथमध्ये कारच्या धडकेत ५ जण गंभीर जखमी
बदलापूर-अंबरनाथ मार्गावरील हॉटेल एस ३ पार्कच्या कारने अनेकांना धडक दिल्याची घटना काल मंगळवारी समोर आली होती. घरगुती वादातून ३८ वर्षीय मुलाने फिल्मी स्टाईलने कार चालवत वडिलांच्या कारचा पाठलाग करत जोरदार धडक दिल्याने झालेल्या दुर्घटनेत ५ जण गंभीर जखमी झाल्याचे समोर आले आहे. ही घटना बदलापूर – अंबरनाथ मार्गावरील चिखलोली गावच्या हद्दीत असलेल्या हॉटेल एस ३ पार्कच्या समोर घडली होती. याप्रकरणी अंबरनाथ पोलीस ठाण्यात वडील बिंदेश्वर शर्मा (वय ६२, रा. कुलाबा मुंबई ) यांच्या तक्रारीवरून मुलगा सतीश शर्मा विरोधात खुनाचा प्रयत्न केल्याचा गुन्हा दाखल आहे.