भाजपचं राज्य नेतृत्त्व आणि पश्चिम महाराष्ट्रातील पक्षाचे प्रमुख नेते यांच्यात सध्या जोरबैठका सुरु आहेत. अजित पवारांचा बालेकिल्ला असलेल्या पुण्यासाठी विशेष व्यूहरचना आखली जात आहे. अजित पवार गटाला पुण्यातील ग्रामीण मतदारसंघ सोडायचे आणि शहरातील जागा आपण लढवायच्या, अशी रणनीती भाजपकडून आखण्यात येत आहे. पक्षानं यासाठीचं सूत्र जवळपास नक्की केलं आहे. त्यानुसार जागावाटप करण्यात येईल.
अजित पवारांसोबतची हातमिळवणी केल्यानं भाजपचा ब्रँड डॅमेज झाला. त्याचा फटका भाजपला लोकसभेला बसला, अशी मांडणी संघाशी संबंधित ऑर्गनायझरनं पराभवाचं विश्लेषण करताना केली. त्यानंतर आता भाजप दक्ष झाला आहे. वरिष्ठ पातळीवरील नेते महायुतीत कोणताच बेबनाव नसल्याचं चित्र दाखवत असले, तरीही मतदारसंघांमध्ये, जमिनीवर असलेली स्थिती वेगळी आहे.
पुणे जिल्ह्यातील भाजपच्या विद्यमान आमदारांनी राज्य नेतृत्त्वाकडे दादा गटाला रोखण्याची मागणी केली आहे. गेल्या आठवड्यात अजित पवार जुन्नरमध्ये होते. त्यावेळी भाजपच्या आशा बुचके रस्त्यावर उतरल्या होत्या. त्यांच्या नेतृत्त्वात भाजपच्या पदाधिकाऱ्यांनी आंदोलन केलं. अजित पवारांच्या ताफ्याला काळे झेंडे दाखवले. यानंतर अजित पवार गटातील अनेक नेत्यांनी संताप व्यक्त केला. त्यात अमोल मिटकरी आघाडीवर होते. त्यांच्या टिकेला भाजपचे माजी आमदार जगदीश मुळीक यांनी प्रत्युत्तर दिलं.
पुण्यातील भाजपच्या एका वरिष्ठ नेत्यानं एका इंग्रजी वृत्तपत्राला दिलेल्या माहितीनुसार, पक्षाच्या राज्य नेतृत्त्वानं गेल्या आठवड्यात झालेल्या बैठकीत नेत्यांना, आमदारांना संभाव्य जागावाटपाची कल्पना दिली. ‘राष्ट्रवादीला पुण्यातील ग्रामीण भागात अधिकाधिक जागा देऊ आणि शहरातील जागा आपल्याला ठेवू. अशाच प्रकारे जागावाटप करण्यात येईल, असं नेतृत्त्वाकडून पुण्यातील नेत्यांना सांगण्यात आलं आहे,’ अशी माहिती या नेत्यानं दिली.
पुण्याच्या शहरी भागातील जवळपास सगळ्याच जागांवर भाजप दावा सांगण्याच्या तयारीत आहे. तसं झाल्यास अजित पवारांच्या दोन विद्यमान आमदारांची गोची होऊ शकते. वडगावशेरीचे आमदार सुनील टिंगरे आणि हडपसरचे आमदार चेतन तुपे यांची भाजपमुळे अडचण होण्याची शक्यता आहे.