संघाच्या विरोधानंतर भाजप दक्ष; दादांना बालेकिल्ल्यातच रोखण्याची तयारी; भाजपचा प्लान रेडी?

पुणे: लोकसभेत बसलेला फटका, त्यानंतर राष्ट्रीय स्वयंसेवक संघाशी संबंधित नियतकालिकांमधून सुरु झालेली टीका यामधून बोध घेत भारतीय जनता पक्षानं आता विधानसभा निवडणुकीची तयारी सुरु केली आहे. अजित पवारांना सोबत घेतल्याचा फटका भाजपला लोकसभेत बसला, असं विश्लेषण ऑर्गनायझर, विवेक नियतकालिकांमधून करण्यात आलं. यानंतर आता भाजपकडून दादांना त्यांच्याच बालेकिल्ल्यात रोखण्याची रणनीती आखली जात आहे.

भाजपचं राज्य नेतृत्त्व आणि पश्चिम महाराष्ट्रातील पक्षाचे प्रमुख नेते यांच्यात सध्या जोरबैठका सुरु आहेत. अजित पवारांचा बालेकिल्ला असलेल्या पुण्यासाठी विशेष व्यूहरचना आखली जात आहे. अजित पवार गटाला पुण्यातील ग्रामीण मतदारसंघ सोडायचे आणि शहरातील जागा आपण लढवायच्या, अशी रणनीती भाजपकडून आखण्यात येत आहे. पक्षानं यासाठीचं सूत्र जवळपास नक्की केलं आहे. त्यानुसार जागावाटप करण्यात येईल.
Maharashtra Politics: दादांच्या ‘अर्थ’चा आक्षेप, तरीही बँकेला कोटींची जागा; माजी शिवसैनिक फडणवीसांचा खास कसा झाला?
अजित पवारांसोबतची हातमिळवणी केल्यानं भाजपचा ब्रँड डॅमेज झाला. त्याचा फटका भाजपला लोकसभेला बसला, अशी मांडणी संघाशी संबंधित ऑर्गनायझरनं पराभवाचं विश्लेषण करताना केली. त्यानंतर आता भाजप दक्ष झाला आहे. वरिष्ठ पातळीवरील नेते महायुतीत कोणताच बेबनाव नसल्याचं चित्र दाखवत असले, तरीही मतदारसंघांमध्ये, जमिनीवर असलेली स्थिती वेगळी आहे.

पुणे जिल्ह्यातील भाजपच्या विद्यमान आमदारांनी राज्य नेतृत्त्वाकडे दादा गटाला रोखण्याची मागणी केली आहे. गेल्या आठवड्यात अजित पवार जुन्नरमध्ये होते. त्यावेळी भाजपच्या आशा बुचके रस्त्यावर उतरल्या होत्या. त्यांच्या नेतृत्त्वात भाजपच्या पदाधिकाऱ्यांनी आंदोलन केलं. अजित पवारांच्या ताफ्याला काळे झेंडे दाखवले. यानंतर अजित पवार गटातील अनेक नेत्यांनी संताप व्यक्त केला. त्यात अमोल मिटकरी आघाडीवर होते. त्यांच्या टिकेला भाजपचे माजी आमदार जगदीश मुळीक यांनी प्रत्युत्तर दिलं.
Maharashtra Politics: अब की बार, कोणीच नाही शंभरीपार; काँग्रेस नंबर वन, भाजप, पवार गटात चुरस; काय सांगतो सर्व्हे?
पुण्यातील भाजपच्या एका वरिष्ठ नेत्यानं एका इंग्रजी वृत्तपत्राला दिलेल्या माहितीनुसार, पक्षाच्या राज्य नेतृत्त्वानं गेल्या आठवड्यात झालेल्या बैठकीत नेत्यांना, आमदारांना संभाव्य जागावाटपाची कल्पना दिली. ‘राष्ट्रवादीला पुण्यातील ग्रामीण भागात अधिकाधिक जागा देऊ आणि शहरातील जागा आपल्याला ठेवू. अशाच प्रकारे जागावाटप करण्यात येईल, असं नेतृत्त्वाकडून पुण्यातील नेत्यांना सांगण्यात आलं आहे,’ अशी माहिती या नेत्यानं दिली.

पुण्याच्या शहरी भागातील जवळपास सगळ्याच जागांवर भाजप दावा सांगण्याच्या तयारीत आहे. तसं झाल्यास अजित पवारांच्या दोन विद्यमान आमदारांची गोची होऊ शकते. वडगावशेरीचे आमदार सुनील टिंगरे आणि हडपसरचे आमदार चेतन तुपे यांची भाजपमुळे अडचण होण्याची शक्यता आहे.