Tej Police Times
विश्रामबाग पोलिसांचा मोठा छापा! ५ घरफोड्या उघड; १६ लाखांचे सोन्याचे दागिने जप्त
पुण्यात घरफोडी करणाऱ्या आरोपीविरोधात विश्रामबाग पोलिसांनी धडाकेबाज कारवाई केली आहे. तब्बल पाच घरफोडीचे गुन्हे उघडकीस आणत आरोपीकडून जवळपास १६ लाख रुपयांचे सोन्याचे दागिने आणि मुद्देमाल जप्त करण्यात आला आहे.विश्रामबाग पोलीस ठाण्यात दाखल घरफोडीच्या गुन्ह्याचा तपास वरिष्ठ पोलीस निरीक्षक नवनाथ जगताप यांच्या मार्गदर्शनाखाली सुरू होता. तपासादरम्यान पोलीस हवालदार नितीन मुंढे आणि पोलीस अंमलदार अनिस शेख यांना मिळालेल्या गोपनीय माहितीच्या आधारे टिळेकरनगर, येवलेवाडी येथे छापा टाकण्यात आला.यावेळी जगदिशसिंग नमनसिंग कलानी, वय ३४ वर्षे, याला ताब्यात घेण्यात आले. चौकशीत त्याने घरफोडी केल्याची कबुली दिल्याचे पोलिसांनी सांगितले.अधिक तपासात विश्रामबाग, भारती आणि विश्रांतवाडी पोलीस ठाण्यांच्या हद्दीतील एकूण पाच घरफोडीचे गुन्हे उघडकीस आले आहेत.विशेष म्हणजे, ओळख लपवण्यासाठी आरोपी मास्क आणि जर्किनचा वापर करत असल्याचे समोर आले असून, त्याचे व्हिडिओ सोशल मीडियावर मोठ्या प्रमाणात व्हायरल झाले होते.या प्रकरणातील आरोपीचा साथीदार पापासिंग दयालसिंग दुधाणी याचा पोलिसांकडून शोध सुरू आहे.
ही कारवाई पुणे पोलिसांच्या वरिष्ठ अधिकाऱ्यांच्या मार्गदर्शनाखाली विश्रामबाग तपास पथकाने केली आहे.