Jalgaon Accident Child saved by doctor : रुद्र गंभीर जखमी अवस्थेत आईच्या देहाजवळ पडला होता. अनेक जण त्या ठिकाणाहून वाहने घेऊन जात होते, मात्र बघ्याची भूमिका अनेकांनी घेतली.
Jalgaon Accident : ट्रकने चिरडलं, आई रक्ताच्या थारोळ्यात, दोन वर्षांचा रुद्र रस्त्यात रडत बसलेला, इतक्यात…
जळगावातील खोटे नगरजवळ दुचाकी आणि ट्रकचा अपघात झाला. त्याच वेळी डॉक्टर चेतन खैरनार हे मायादेवी नगरकडील आपल्या घराकडे जात होते. अपघात झाल्याचे दिसताच त्यांनी आपली दुचाकी घटनास्थळी नेली. त्या ठिकाणी पोहोचल्यानंतर एक महिला आणि एका तरुणीचा मृत्यू झाल्याचे दिसून आले, तर दोन वर्षांचा चिमुरडा रुद्र जखमी अवस्थेत होता. रुद्रच्या कपाळाला जबर जखम झाल्यामुळे त्याला उचलण्याचं धाडस कोणत्याही नागरिकाकडे नव्हतं, मात्र गंभीर जखमी रुद्रला पाहताच डॉक्टरांनी तातडीने निर्णय घेतला.
डॉक्टर चेतन खैरनार यांना रुद्र जखमी असल्याचे आढळले. त्यांनी कोणताही विचार न करता रुद्रला पोलिसांच्या गाडीमध्ये टाकून खाजगी रुग्णालयात उपचारासाठी नेले. रुद्रला दुखापत झाल्यामुळे मोठ्या प्रमाणात रक्तस्त्राव होत होता. त्यामुळे त्याच्यावर तातडीने उपचार होणे गरजेचे होते. डॉक्टर खैरनार यांनी दाखवलेल्या तत्परतेमुळे रुद्रला वेळेवर उपचार मिळाले, अन्यथा रुद्रचा देखील जीव गेला असता.
मृतांचा चेहरा झाकण्यासाठी तरुणींनी दिल्या ओढण्या
दिक्षिता व पायल या दोघींच्या चेहऱ्यावरून ट्रक गेल्यामुळे दोघींच्या चेहऱ्याचा चेंदामेंदा झाला होता. प्रवीण वाघ या पोलीस कर्मचाऱ्याला दोघींच्या चेहऱ्यावर टाकण्यासाठी शेजारी काहीही न मिळाल्याने त्यांनी रस्त्यावरून जात असलेल्या मुलींकडून ओढण्या मागितल्या. त्या मुलींनीही क्षणाचाही विचार न करता आपल्या ओढण्या मृतदेहावर झाकण्यासाठी दिल्या. एकीकडे अपघात झाल्यानंतर मदत न करता मोबाईलमध्ये व्हिडिओ काढण्यात दंग असणाऱ्यांची संख्या वाढली असताना काही जण मात्र या काळातही आपली माणुसकी जपताना दिसून आले हे या अपघातातून निष्पन्न झाले.