Maharashtra Assembly Elections 2024: भाजपने आगामी विधानसभा निवडणुकीसाठी १२५ जिंकण्याचे लक्ष्य ठेवले आहे. यासाटी भाजपने रणनिती आखली असून त्यासाठी राष्ट्रीय स्वयंसेवक संघाची साथ असणार आहे.
राज्यातील आगामी विधानसभा निवडणुकीसाठी भाजपने मिशन १२५ अर्थात सव्वाशे पार हाती घेतले असून त्यादृष्टीने रणनिती आखल्याचे समजते. विशेष म्हणजे या कामात राष्ट्रीय स्वयंसेवक संघानेही भाजपच्या हातात हात घालून कामाला लागण्याचे ठरवल्याचे समजते. हाती घेतलेले मिशन यशस्वी करण्यासाठी एक जिल्हा एक नेता याअंतर्गत प्रत्येक नेत्याकडे एका जिल्ह्याची जवाबदारी देण्यात येणार असल्याचे समजते.
महाराष्ट्रातील लोकसभा निवडणुकीचा पराभव भाजपच्या नेत्यांना जिव्हारी लागलेला असून लोकसभा निवडणुकीतील चूका टाळत आगामी विधानसभा निवडणुकीत जोरदार यश मिळविण्यासाठी राज्यातील भाजपने कंबर कसली आहे. लोकसभा निवडणुकीमध्ये काहीसा शांत राहिलेला राष्ट्रीय स्वयंसेवक संघही सर्व मरगळ झटकून विधानसभा निवडणुकीसाठी सक्रिय झालेला आहे. त्यांच्या मदतीने आगामी विधानसभेसाठी भाजपने मिशन ‘सव्वाशे पार’ हात घेतल्याच समजते. त्यादृष्टीने राज्यातील भाजपने विशेष रणनिती आखली असून त्यासाठी दिल्लीतील नेत्यांचेही मदत घेतली जाणार आहे.
भाजपने राज्यातील विधानसभा जांगाचा आढावा घेतला असून त्यानुसार त्यांच्या ५० ते ६० जागा सहजासहजी निवडून येणार आहेत. उर्वरीत ६० ते ६५ जागा निवडून आणण्यासाठी त्यांना विशेष मेहनत घ्यावी लागणार आहे. त्यानुसार या जागांची जवाबदारी काही नेत्यांच्या खांद्यावर देण्यात येणार आहे. त्यानुसार एक जिल्हा एक नेता अशी रचना तयार करण्यात येणार आहे. त्यानुसार प्रत्येक नेत्याला याबाबतची जवाबदारी देण्यात येणार असून त्यावर थेट दिल्लीतून लक्ष ठेवले जाणार आहे. या नेत्याच्या सोबतीला संबंधित जिल्ह्यातील संघाच्या कार्यकर्त्यांची फळी मैदानात उतरणार आहे.
उमेदवारांना पुरसा प्रचाराला वेळ मिळावा यासाठी उमेदवारांची यादीही लवकर जाहीर करण्यात येणार असल्याचे समजते. मुंबईतील विधानसभेच्या जागांसाठी भाजप उमेदवारांची यादी येत्या आठवड्याभरात निश्चित करण्यात येणार असल्याचे समजते. त्याचाच भाग म्हणून ३० ऑगस्टला मुंबईत भाजपची महत्त्वाची बैठक बोलावण्यात आली आहे. महाराष्ट्र प्रभारी भूपेंद्र यादव, केंद्रीय सह संघटनमंत्री शिवप्रकाश, उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे, मुंबई अध्यक्ष आशिष शेलार या बैठकीला उपस्थित राहणार आहेत.