Dhule News : धुळे शहरातील आझाद नगर पोलीस ठाण्याच्या हद्दीत पारोळा रोड नजीकच्या नालीत एक मृतदेह संशयास्पद स्थितीत आढळून आला. आझाद नगरच्या कृषी महाविद्यालय परिसरातील शेतकरी पुतळ्याजवळ काल सायंकाळी हा मृतदेह आढळून आला. घटनेने संपूर्ण आझाद नगर परिसरात खळबळ उडाली आहे.
पारोळा रोड हा धुळे शहरातून जळगावकडे जाणारा हा मुख्य रस्ता आहे. या रस्त्यावर मोठ्या प्रमाणात रहदारी असते. याच परिसरात वावरत असलेल्या नागरिकांना नालीमधून ठिकाणाहून दुर्गंधी येत होती. याबद्दल तात्काळ पोलिसांना माहिती देण्यात आली. माहिती मिळताच पोलिसांनी घटनास्थळी धाव घेतली. पोलिसांनी पंचनामा करुन मृतहेद ताब्यात घेतला आहे. तर मृतदेह शवविच्छेदनासाठी हिरे वैद्यकीय रुग्णालयात पाठवला आहे.
सध्या मृतदेहाची ओळख पटली असून मृतक पुरुषाचे नाव अजय बाविस्कर असे असून त्याचे वडील राजू बाविस्कर यांनी अजयच्या हातावरील खुणेवरुन त्याची ओळख पटवली आहे. मृतक पारोळा तालुक्यातील मोंढाळे पिंपरी येथील रहिवासी होता. तरी सध्या अजयच्या मृत्यूचे कारण अद्याप स्पष्ट झाले नसून पुढील तपास सुरु आहे, अशी माहिती पोलीस अधिकारी निवृत्ती पवार यांनी दिली आहे.