Pune Bus Accident: भरधाव ट्रॅव्हल्सची दुचाकीला जोरधार धडक, तिघांचा जागीच मृत्यू; पुण्यात भीषण अपघात

पोलिसांनी दिलेल्या माहितीनुसार, दुचाकीवरील तिघेजण पहाटे दीडच्या सुमारास नाशिकच्या बाजूने पुण्याकडे जात असताना एका खासगी ट्रॅव्हल्सने जोरात धडक दिली. या घटनेनंतर ट्रॅव्हल्सचालक घटनास्थळावरून फरार झाला होता. मात्र स्थानिक ग्रामस्थांनी त्याला पाठलाग करून पकडले आणि चोप दिला. या अपघातामध्ये तिघांचा मृत्यू झाला. या प्रकरणी तुकाराम जानकु गारे यांनी मंचर पोलीस ठाण्यात फिर्याद दाखल केली आहे. या प्रकरणी ट्रॅव्हल्स चालकावर गुन्हा दाखल करण्यात आला आहे. मंचर पोलीस ठाण्याचे पोलीस निरीक्षक श्रीकांत कंकाळ यांच्या मार्गदर्शनाखाली पुढील तपास पोलीस उपनिरीक्षक सुनील धनवे करत आहेत.

या घटनेमुळे या परिसरात काही वेळ तणावाचे वातावरण निर्माण झाले होते. ट्रॅव्हल्स चालकाचे नियंत्रण सुटल्याने अपघात झाल्याची माहिती समोर येत आहे. मात्र, यामुळे तिघांना नाहक आपला जीव गमवावा लागला आहे.