Maharashtra Election 2024: भाजपचे नेते देवेंद्र फडणवीस यांनी लोकसभेतील विरोधीपक्ष नेते राहुल गांधी यांच्यावर गंभीर आरोप केले आहेत. भारत जोडो आणि संविधानाच्या नावाखाली देशाच्या एकात्मतेला धोका निर्माण होईल असे काम होत असल्याची टीका फडणवीसांनी केली आहे.
‘भारत जोडो’ हा जो एक समूह तयार करण्यात आला आहे. या समूहामध्ये अशा अनेक संघटना आहेत, ज्या अतिशय डाव्या विचारांच्या आहेत. ज्यांची ध्येय धोरणे पाहिली, त्यांच्या कामाची पद्धत पाहिली ती अराजक पसरवणारी व्यवस्था असल्याचे फडणवीस म्हणाले.
एका बाजूला राहुल गांधी सर्वांना एक पुस्तक दाखवतात. संविधानाचा सन्मान केला पाहीजे. मग लाल संविधानच का? तुम्ही कोणाला इशारा देताय? लाल संविधान किंवा लाल पुस्तक दाखवून कोणाला इशारे दिले जात आहेत. तुम्ही अराजक पसरवत आहात. संविधान आणि भारत जोडो याच्या नावाखाली अराजकता पसरवणाऱ्या लोकांना एकत्रित करून समाजात विद्वेष आणि अराजकता तयार करण्याचे काम सुरू असल्याचा गंभीर आरोप उपमुख्यमंत्री देवेंद्र फडणवीस यांनी केला.
अर्बन नक्षलवाद हा यापेक्षा वेगळा नाही असे सांगत फडणवीस पुढे म्हणाले. अर्बन नक्षलवाद म्हणजे लोकांची मने दूषित करायची, त्यांच्या मनात अराजकतेचे विचार आणायचे जेणेकरून देशातील ज्या व्यवस्था आहेत, संस्था आहेत त्यावरील विश्वास उडेल आणि देशातील एकतेला, एकात्मतेला धोका निर्माण होईल, असे काम राहुल गांधी यांच्या माध्यमातून होत आहे.
काल ५ नोव्हेंबर रोजी महायुतीने कोल्हपूरात प्रचाराचा नारळ फोडला. या वेळी फडणवीसांनी उद्धव ठाकरे यांच्यावर जोरदार हल्ला चढवला. उद्धव ठाकरेंनी शिवाजी महाराजांच्या सुरत लुटीचा उल्लेख केला होता. यावरून फडणवीसांनी त्यांचा समाचार घेतला. तर मुख्यमंत्री एकनाथ शिंदे यांनी १० मोठी आश्वासने दिली. ज्यात पोलिस दलात महिलांची भरती, शेतकऱ्यांची कर्ज माफी, लाडकी बहिण योजनेतील रक्कम २ हजार रुपये करणे आदी आश्वासनांचा समावेश होता. आता फडणवीसांनी अर्बन नक्षलवादावरून केलेल्या आरोपवरून निवडणुकीच्या काळात राजकारण पेटणार असल्याचे दिसते.