Latur News : लातूरच्या उदगीर-नांदेड महामार्गावरील एकुरका गावाजवळ ट्रक आणि कारचा भीषण अपघात घडला आहे. या अपघातात कारमधील एकाच कुटुंबातील चार जणींचा जागीच मृत्यू झाला आहे.
उदगीर तालुक्यातील एकुरका जवळ टेम्पो आणि कारची धडक झाली आणि भीषण अपघात घडला. या घटनेत चार जणी जागीच ठार झाल्याची चटका लावणारी घटना दुपारी दोन वाजता घडली आहे. मंगलबाई गोविंद जाधव, वय ५५ राहणार एकुरका, प्रतिभा संजय भंडे वय ३० वर्ष राहणार दावणगाव, प्रणिता पांडुरंग बिरादार वय २५ राहणार होणाळी, अनन्या रणजित भंडे वय १४ वर्ष राहणार दावणगाव यांचा अपघातात जागीच मृत्यू झाला. चौघींचेही मृतदेह शवविच्छेदन करण्यासाठी उदगीर सामान्य रुग्णालयात दाखल करण्यात आले आहे. तर अन्य तीन जखमींवर देखील उपचार सुरू आहेत. तर या घटनेचा अधिक तपास पोलीस करत आहे. या घटनेमुळे दावणगाव गावावर शोककळा पसरली आहे.