रीलिजआधीच मराठी सिनेमाने कमावला कोट्यवधींचा गल्ला, बॉक्स ऑफिसवर ‘गुलाबी’ची हवा; किती झाली कमाई?

रीलिजआधीच मराठी चित्रपटाने कमावला १ कोटी रुपयांचा गल्ला

‘गुलाबी’च्या स्टारकास्टमुळे या चित्रपटाच्या घोषणेपासूनच प्रेक्षकांमध्ये उत्सुकता होती. अभिनेत्री श्रुती मराठे, मृणाल कुलकर्णी आणि अश्विनी भावे या तीन आघाडीच्या अभिनेत्रींची ‘गुलाबी’मध्ये मुख्य भूमिका आहे. बुकिंग सुरू होताच महाराष्ट्रातील विविध शहरांमध्ये मोठ्या प्रमाणात प्रेक्षकांनी तिकिचे बुक केली आहेत. लेटेस्ट अपडेटनुसार या चित्रपटाचे प्री-बुकिंग एक कोटी रुपयांपर्यंत पोहोचले आहे. ‘गुलाबीने घडविला इतिहास’, असे म्हणत या सिनेमाच्या टीमने याविषयीची पोस्ट इन्स्टाग्रामवर शेअर केली आहे. या पोस्टमधून त्यांनी असा दावा केला आहे की, रीलिजआधी १ कोटींची कमाई करणारा हा पहिलाच मराठी सिनेमा आहे.

‘गुलाबी’चे दिग्दर्शन अभ्यंग कुवळेकरने केले असून त्याने अशी प्रतिक्रिया दिली की, ‘पूर्वप्रदर्शनापूर्वीच प्रेक्षकांचा हा प्रतिसाद अपेक्षेपेक्षा खूप मोठा आहे. प्रेक्षकांचा हा पाठिंबा “गुलाबी” चित्रपटासाठी खूप महत्त्वाचा आहे आणि आम्ही या प्रवासाचा आनंद घेत आहोत. “गुलाबी” चित्रपटात मैत्री आणि स्वप्नांचा एक सुंदर प्रवास दाखवला आहे. लोकांच्या हृदयात “गुलाबी”ने आधीच स्थान मिळवले आहे याचा खूप आनंद होतो. प्रेक्षकांना चित्रपट नक्की आवडेल याची खात्री आहे.’

‘शालीचे धागे निघालेत, पण विंगेत उभं राहिल्यावर…’ नाटकाच्या ५५० प्रयोगांसाठी अभिनेत्याने वापरली एकच शाल
व्हायोलेट फ्लेम मोशन पिक्चर्स प्रस्तुत, अभ्यंग कुवळेकर दिग्दर्शित ‘गुलाबी’ या चित्रपटाची निर्मिती सोनाली शिवणीकर, शीतल शानभाग, अभ्यंग कुवळेकर आणि स्वप्नील भामरे यांनी केली आहे. मृणाल, अश्विनी आणि श्रुतीसह सिनेमात कलाकारांची फौज पाहायला मिळेल. ज्येष्ठ अभिनेत्री सुहास जोशी, अभिनेता शैलेश दातार, आणि निखिल आर्या यांच्याही महत्त्वपूर्ण भूमिका आहेत. तर अमोल भगत या चित्रपटाचे एक्झिक्युटिव्ह प्रोड्युसर आहेत.