Pratibha Dhanorkar Warora Constituency : खासदार म्हणून मी पाच वर्ष राहणार आहे, विरोध करणाऱ्यांचा लेखाजोखा घेणार अशी धमकीच वरोरा विधानसभा मतदारसंघात खासदार प्रतिभा धानोरकर यांनी दिली आहे.
वरोरा विधानसभा मतदारसंघातील काँग्रेसचे उमेदवार प्रवीण काकडे यांच्या प्रचारार्थ खासदार इमरान प्रतापगढी यांची प्रचारसभा सोमवारी झाली. या सभेला खासदार धानोरकर यांची प्रमुख उपस्थिती होती. या सभेला संबोधित करताना त्यांनी हा धमकीवजा इशारा दिला. यासंदर्भातील व्हिडिओ सोशल मीडियावर व्हायरल होत आहे.
काय म्हणाल्या प्रतिभा धानोरकर?
खासदार धानोरकर म्हणाल्या, ‘आज जे लोक माझा विरोध करत आहेत. माझ्या विरोधात बोलत आहेत. आत्ता मी कुणाला काहीही बोलणार नाही. त्यांनी लक्षात घ्यावे की, लोकसभा क्षेत्रात २८०० गावे आहेत. या गावांतील कोण कार्यकर्ता माझ्या बाजूने होता. कोण विरोधात होता. प्रत्येकाचा आढावा आजही माझ्याजवळ आहे. ही तर एक विधानसभा आहे. फक्त ३०० गावांची आहे. या विधानसभेतील गावनिहाय, घरनिहाय कुणी विरोध केला आणि कोण बाजूने होता याचा चिठ्ठा काढण्यास फार वेळ लागणार नाही. २० नोव्हेंबरला मतदान झाले की गावनिहाय यादी माझ्याकडे येईल. कोणाला कसे ठेवायचे आणि कुणाला बारीक करायचे याचा सर्व विचार मी या ठिकाणी करून आहे’, असा दमही त्यांनी दिला.
Pratibha Dhanorkar : माझा विरोध करणाऱ्या प्रत्येकाचा… खासदार प्रतिभा धानोरकरांची कुणबी समाजाला खुली धमकी, व्हायरल व्हिडिओची चर्चा
या मतदारसंघात दिवंगत माजी खासदार बाळू धानोरकर यांचे बंधू अनिल धानोरकर यांनी बंडखोरी करत वंचित बहुजन आघाडीकडून अपक्ष अर्ज दाखल केला आहे. अनिल यांना काँग्रेसकडून उमेदवारी अपेक्षित होती. पण, खासदार प्रतिभा धानोरकर यांनी भाऊ प्रवीण काकडे यांच्यासाठी जोर लावला. यावरून धानोरकर कुटुंबात फूट पडल्याचीही चर्चा आहे.