Sanjay Raut on Eknath Shinde Viral Photo : मुख्यमंत्रिपदासाठी दिल्लीमध्ये देवेंद्र फडणवीस, अजित पवार आणि एकनाथ शिंदे यांची अमित शहा यांच्या उपस्थितीत बैठक होत आहेत. गुरूवारी झालल्या बैठकीनंतर शिंदेचा एक फोटो चांगलाच व्हायरल झाला आहे. ज्यात शिंदे नाराज आणि फडणवीस आनंदी दिसत आहेत. या फोटोवरून संजय राऊत यांनी शिंदेवर निशाणा साधला आहे.
व्हायरल झालेल्या फोटोमध्ये काय?
महाराष्ट्रात सरकार स्थापन करण्याआधी भाजप नेते देवेंद्र फडणवीस, अजित पवार आणि एकनाथ शिंदे यांच्या दिल्लीमध्ये जोर-बैठका सुरू आहेत. मुख्यमंत्रिपदावरून चाललेल्या रस्सीखेचमध्ये फडणवीस अग्रेसर ठरल्याची माहिती समजत आहे. सोशल मीडियावर देशाचे गृहमंत्री अमित शहा आणि देवेंद्र फडणवीस यांना गुच्छ देत असून त्यावेळी बाजूला उभे असलेल्या एकनाथ शिंदे यांच्या चेहऱ्यावर स्पष्टपणे नाराजी दिसून आली. तर फडणवीस यांच्या चेहऱ्यावर हास्य फुलले होते. हा फोटो सोशल मीडियावर व्हायरल होत असून यावरूनच आता फडणवीस यांच्या नावावर दिल्लीतून शिक्कामोर्तब झाल्याची राजकीय वर्तुळात जोरदार चर्चा आहे. या फोटोवर संजय. राऊत यांनी आपली प्रतिक्रिया देताना शिंदेवर निशाणा साधला आहे.
उगवता सूर्य आणि मावळता सूर्य थोडातरी फरक असतो. उगवत्या सूर्याचे तेज एकाबाजूला दिसत आहे. दुसऱ्या बाजूला मावळतीचा सूर्य झुकताना वाकताना दिसत आहे, ढगाआड जातना दिसतोय. राजकारण आहे, राजकारणात काय होईल सांगता येत नाही, चंचल असतं राजकारण, असं संजय राऊत म्हणाले.
व्हायरल फोटावर शिंदे काय म्हणाले?
मी कधी गंभीर असतो तर कधी हसरा असतो. बैठक सकारात्मक झाली असून आमची सत्तास्थापनेबाबत चर्चा झाली आहे. आमच्यामध्ये समन्वय आहे, मी काळजीवाहू मुख्यमंत्री असल्याने सर्वांची काळजी घेतो, असं मोघम उत्तर एकनाथ शिंदे यांनी दिलं.