विधानसभा निवडणुकीचे निकाल लागले तरी महाराष्ट्रात नव्या सरकारची स्थापना झाले नाही. सत्तास्थापनेचा पेच सुटत नाहीये. शिंदे यांच्या प्रकृती अस्वास्थ्यामुळे चर्चा आणि अफवा वाढल्या आहेत. श्रीकांत शिंदे यांच्या उपमुख्यमंत्रिपदी विराजमान होण्याच्या बातम्या निराधार असल्याचे त्यांनी स्पष्ट केले आहे. सत्तेत कोणत्याही पदाची त्यांना लालसा नसल्याचे त्यांनी सांगितले.
महायुतीच्या सरकारचा शपथविधी थोडा लांबल्यामुळे सध्या चर्चा आणि अफवा यांचे पीक फोफावले आहे. काळजीवाहू मुख्यमंत्री एकनाथ शिंदे यांनी प्रकृती अस्वास्थ्यामुळे दोन दिवस गावी जाऊन विश्रांती घेतली. त्यामुळे अफवांना अधिकच बहर आला. मी उपमुख्यमंत्री होणार अशा बातम्या प्रश्नचिन्हे टाकून गेले दोन दिवस दिल्या जात आहेत. यात कोणतेही तथ्य नसून माझ्या उपमुख्यमंत्री पदाबाबतच्या सर्व बातम्या निराधार आणि बिनबुडाच्या असल्याचं श्रीकांत शिंदे यांनी सांगत या चर्चांना पूर्णविराम दिला आहे.
लोकसभा निवडणुकीनंतरही मला केंद्र सरकारमध्ये मंत्रिपदाची संधी होती. मात्र पक्षसंघटनेसाठी काम करण्याचा विचार करून मी तेव्हाही मंत्रिपदाला नकार दिला होता. सत्तेतल्या पदाची मला कुठलीही लालसा नाही. राज्यातील सत्तेत कोणत्याही मंत्रिपदाच्या शर्यतीत मी नाही, हे पुन्हा एकदा स्पष्ट करतो. माझा लोकसभा मतदारसंघ आणि शिवसेना या पक्षासाठीच नेटाने काम करणार असल्याचं श्रीकांत शिंदे यांनी सांगितलं. माध्यमांचा उत्साह आणि स्पर्धा आम्ही समजू शकतो, परंतु बातम्या देतांना त्यांनी वास्तवाकडे पाठ फिरवू नये अशी माझी विनंती आहे. माझ्यासंदर्भातल्या चर्चांना आता तरी पूर्णविराम मिळेल अशी माफक अपेक्षा, असं श्रीकांत शिंद म्हणाले.
दरम्यान, महायुतीमध्ये सर्व काही आलबेल असल्याचं सेना- भाजप नेत्यांकडून सांगण्यात येत आहे. एकनाथ शिंदे यांनी गृहमंत्रिपदाची मागणी केल्याचीही जोरदार चर्चा आहे. तर दुसरीकडे भाजप प्रदेशाध्यक्ष चंद्रकांत बावनकुळे यांनी ५ डिसेंबरला मुंबईतील आझाद मैदानावर शपथविधी होणार असल्याचं सांगितलं आहे. मात्र अद्याप महायुतीचा मुख्यमंत्री कोण असणार याबाबतही कोणतीच अधिकृत घोषणा केलेली नाही.