भाजपने मुक्ता टिळक यांचे पुत्र कुणाल यांना प्रदेश प्रवक्तेपदी नेमल्याने कसब्याच्या पोटनिवडणुकीत टिळक कुटुंबाच्या बाहेरील व्यक्तीला उमेदवारी मिळणार, हे निश्चित झालं होतं. सुरुवातीला ही निवडणूक बिनविरोध करण्यासाठी प्रयत्न करण्याचा दावा करणाऱ्या भाजपकडेच पाचहून अधिक इच्छुक उमेदवार होते. मात्र पुण्यातील नेत्यांच्या बैठकीनंतर मुंबईतही राज्य पातळीवरील नेत्यांमध्ये खलबतं झाली आणि हेमंत रासने यांच्या नावावर शिक्कामोर्तब करण्यात आलं.
दुसरीकडे, चिंचवडमध्ये जगताप कुटुंबातून कुणाला संधी दिली जाणार यााबबत चर्चा सुरू असताना भाजपने दिवंगत आमदार लक्ष्मण जगताप यांच्या पत्नी अश्विनी जगताप यांचं नाव उमेदवारीसाठी निश्चित केलं आहे.
कसब्यात महाविकास आघाडीकडून कोण?
पारंपरिक मतदारसंघ असल्याने काँग्रेसनेही ही निवडणूक लढविण्याची तयारी केली आहे. पक्षाने सहा इच्छुकांची यादी हायकमांडकडे पाठवल्याचे प्रदेशाध्यक्ष नाना पटोलेंनी स्पष्ट केले आहे. तर कॉंग्रेसकडे हा मतदारसंघ असला तरी पाच वेळा कॉंग्रेस येथे पराभूत झाली आहे. पोटनिवडणूक जाहीर झाल्यानंतरही कॉंग्रेसमध्ये कोणतीही हालचाल दिसून येत नाही. हा मतदारसंघ भाजपसाठी मोकळे रान ठरू नये, यासाठी राष्ट्रवादी काँग्रेसने ही निवडणूक लढवावी, अशी मागणी शहराध्यक्ष प्रशांत जगताप यांनी अजित पवार यांच्याकडे केली. महाविकास आघाडीचाच भाग असलेल्या शिवसेनेनेही उमेदवारीची तयारी केल्याने महाविकास आघाडीतील तिढा शुक्रवारी मुंबईत होणाऱ्या बैठकीत तरी सुटणार का, याकडे लक्ष लागले आहे.
मनसेची बैठक आज
कसबा पेठ विधानसभा पोटनिवडणूक लढविण्यासंदर्भात महाराष्ट्र नवनिर्माण सेनेचे काही कार्यकर्ते, पदाधिकारी आग्रही आहेत. त्यामुळे पक्षाने आज (शुक्रवारी) संकल्प मेळाव्याचे आयोजन केले आहे. अंधेरीत पोटनिवडणूक होऊ नये, यासाठी राज ठाकरे यांनीच पुढाकार घेतल्यानंतर भाजपने माघार घेतली होती. या पार्श्वभूमीवर या मेळाव्याला महत्त्व प्राप्त झाले आहे.