Tej Police Times
पुणे : विद्यमान आमदारांच्या निधनामुळे रिक्त झालेल्या कसबा आणि चिंचवड विधानसभा मतदारसंघातील पोटनिवडणुकीसाठी भाजपने अखेर आपल्या उमेदवारांची घोषणा केली आहे. कसब्यातून हेमंत रासने हे तर चिंचवडमधून अश्विनी जगताप या भाजपच्या अधिकृत उमेदवार असणार आहेत. भाजपने आपल्या उमेदवारांची घोषणा केल्यानंतर आता या दोन्ही जागांवर महाविकास आघाडीकडून कोणते उमेदवार रिंगणात उतरतात, याबाबतची उत्सुकता वाढली आहे.
पुण्यातील भीषण अपघातात आई-मुलाचा करुण अंत; महिलेचं सरपंच होण्याचं स्वप्नही अधुरं
दुसरीकडे, चिंचवडमध्ये जगताप कुटुंबातून कुणाला संधी दिली जाणार यााबबत चर्चा सुरू असताना भाजपने दिवंगत आमदार लक्ष्मण जगताप यांच्या पत्नी अश्विनी जगताप यांचं नाव उमेदवारीसाठी निश्चित केलं आहे.
कसब्यात महाविकास आघाडीकडून कोण?
पारंपरिक मतदारसंघ असल्याने काँग्रेसनेही ही निवडणूक लढविण्याची तयारी केली आहे. पक्षाने सहा इच्छुकांची यादी हायकमांडकडे पाठवल्याचे प्रदेशाध्यक्ष नाना पटोलेंनी स्पष्ट केले आहे. तर कॉंग्रेसकडे हा मतदारसंघ असला तरी पाच वेळा कॉंग्रेस येथे पराभूत झाली आहे. पोटनिवडणूक जाहीर झाल्यानंतरही कॉंग्रेसमध्ये कोणतीही हालचाल दिसून येत नाही. हा मतदारसंघ भाजपसाठी मोकळे रान ठरू नये, यासाठी राष्ट्रवादी काँग्रेसने ही निवडणूक लढवावी, अशी मागणी शहराध्यक्ष प्रशांत जगताप यांनी अजित पवार यांच्याकडे केली. महाविकास आघाडीचाच भाग असलेल्या शिवसेनेनेही उमेदवारीची तयारी केल्याने महाविकास आघाडीतील तिढा शुक्रवारी मुंबईत होणाऱ्या बैठकीत तरी सुटणार का, याकडे लक्ष लागले आहे.
मनसेची बैठक आज
कसबा पेठ विधानसभा पोटनिवडणूक लढविण्यासंदर्भात महाराष्ट्र नवनिर्माण सेनेचे काही कार्यकर्ते, पदाधिकारी आग्रही आहेत. त्यामुळे पक्षाने आज (शुक्रवारी) संकल्प मेळाव्याचे आयोजन केले आहे. अंधेरीत पोटनिवडणूक होऊ नये, यासाठी राज ठाकरे यांनीच पुढाकार घेतल्यानंतर भाजपने माघार घेतली होती. या पार्श्वभूमीवर या मेळाव्याला महत्त्व प्राप्त झाले आहे.