याप्रकरणी राखीच्या वकील फाल्गुनी यांनी प्रसारमाध्यमांशी संवाद साधताना सांगितलं की, ‘आदिलवर लावण्यात आलेल्या कलमांच्या आधारे पोलिसांनी आरोपीची ७ दिवसांची पोलीस कोठडी मागितली होती. मात्र न्यायालयाने पोलीस कोठडी न देता आदिलची न्यायालयीन कोठडीत रवानगी केली. पोलीस अजूनही तपास करत आहेत, अशा स्थितीत पोलिसांना आदिलचा रिमांड मिळायला हवा होता. भविष्यात आदिल जेव्हा सत्र न्यायालयात जामिनासाठी अर्ज करेल, तेव्हा आम्ही त्याला विरोध करू.’
वकिल फाल्गुनी यांनी कोर्टात राखीचा बचाव करताना सांगितलं की, आदिल राखीला फक्त मारहाण करत असे नाही तर तिचे पैसेही चोरत असे. आदिलने राखीचे काही व्हिडिओही बनवले आहेत, ज्यासाठी तो तिला ब्लॅकमेल करायचा. फाल्गुनी म्हणाल्या की, हे गंभीर आरोप असून त्यांच्या तपासाला वेळ लागतो, त्यामुळे आदिलला ७ दिवसांची पोलीस कोठडी देण्यात यावी, अशी विनंती आम्ही न्यायालयाकडे केली होती. मात्र न्यायालयाने त्याला न्यायालयीन कोठडी सुनावल्याने त्याच्या चौकशीला आणखी वेळ लागण्याची शक्यता आहे. त्यामुळे आदिलला अटक होऊनही तो त्याचे गुन्हे मान्य करायला तयार नाहीये. त्याच्या वकिलांनी उलट राखी आदिलला मारहाण करत असल्याचे आरोप केले आहेत. त्यामुळे राखीही या प्रकरणात पुरती फसली असल्याचं चित्र आहे.
मंगळवारी रात्री राखीचा भाऊ आणि मित्र वाहिद खान यानेही मीडियासमोर तिच्यासोबत गैरवर्तन आणि मारहाण झाल्याचे पुरावे दाखवले. राखीच्या भावाने सांगितलं की, जेव्हा डॉक्टरांनी राखीचा चेकअप केला तेव्हा तिला क्रूरतेने मारहाण करण्यात आली असं म्हटलं. त्याने सांगितले की, ज्या दिवशी राखीच्या आईचं निधन झालं, त्याच दिवशी आदिलने तिला बेदम मारहाण केली होती.