गुरुवार दि. ९ फेब्रुवारी रोजी सकाळी साडेदहा वाजताच्या सुमारास तक्रारवाडी (ता. इंदापूर) येथील उजनी जलाशयाच्या बॅकवॉटरमध्ये एका मच्छिमाराला एका बॅगेमध्ये मृतदेह आढळून आला. याबाबत तक्रारवाडीचे पोलिस पाटील अमर धुमाळ यांनी भिगवण पोलिस ठाण्यात माहिती दिली आहे.
संबंधित मृतदेहाचे तुकडे करण्यात आले आहेत. धारदार शस्त्राने डोके मानेपासून बाजूला करून दोन्ही हात व दोन्ही पाय कापले आहेत. मृताची ओळख पटू नये म्हणून त्याचे अवयव प्लास्टिकच्या कागदामध्ये निळ्या, पांढऱ्या रंगाच्या पिशव्यांमध्ये भरून पुरावा नष्ट करण्याच्या हेतूने जलाशयात फेकल्याचा प्रकार झाला आहे.
एवढ्या निर्घृणपणे खून केल्याचा प्रकार उघडकीस आल्याने बारामती विभागाचे अप्पर पोलीस अधीक्षक आनंद भोईटे, स्थानिक गुन्हे शाखेचे पोलीस निरीक्षक अविनाश शिळीमकर, भिगवण पोलीस ठाण्याचे सहाय्यक पोलीस निरीक्षक दिलीप पवार, पोलीस उपनिरीक्षक रुपेश कदम यांनी घटनास्थळी भेट देऊन माहिती घेतली व सदर गुन्ह्याच्या अनुषंगाने तपास सुरू केला आहे.
मृताचे वय अंदाजे ३० ते ३५ वर्षाचे असून दोन्ही हात पाय बाजूला व डोके बाजूला केले असून मयताच्या उजव्या हाताचे मनगटाच्या पाठीमागे टॅटू काढलेला आहे. मयताची ओळख अद्याप पटलेली असून यासाठी नागरिकांना पोलिसांनी आवाहन केले आहे.