नुकत्याच समोर आलेल्या पठाणच्या आकड्यांवर नजर टाकली असता, चित्रपटाची किती क्रेझ अजूनही टिकून आहे, हे दिसून येतंय. चित्रपट प्रदर्शित झाल्यानंतर २५ दिवसांनंतरही चित्रपट जोरात सुरू आहे. २५ व्या दिवशी चित्रपटानं बॉक्स ऑफिसवर तब्बल ३.२५ कोटींची कमाई केली आहे. चर आतापर्यंतची कमाई ५११.४२ कोटींवर गेली आहे. यासोबतच ‘पठाण’नं साऊथ स्टार प्रभासच्या बाहुबली २चा रेकॉर्डही मोडला आहे. तर ‘पठाण’ बॉक्स ऑफिसवर आत्तापर्यंत सगळ्यात जास्त कमाई करणारा हिंदी चित्रपट ठरला आहे.
इतकंच नाही तर ‘पठाण’ हा शाहरुख ,दीपिका पादुकोण, जॉन अब्राहम या तिघांच्या करिअरमधलाही सर्वात जास्त कमाई करणारा सिनेमा ठरला आहे.
SRK आनंदात
‘पठाण’ या सिनेमाच्या यशानं शाहरुख खान सध्या आनंदात आहे. या यशानं आता चाहते त्याच्या आगामी सिनेमाची वाट पाहत आहेत. शाहरुख सलग तीन चित्रपटांत दिसणार आहे. ‘जवान’ हा त्याचा चित्रपट तयार असून, त्याचं दिग्दर्शन दाक्षिणात्य दिग्दर्शक अटली यानं केलं आहे. यात नयनतारा शाहरुखची नायिका आहे.
‘डंकी’ ची उत्सुकता
याशिवाय शाहरुख राजकुमार हिरानी यांच्या ‘डंकी’ या चित्रपटातही दिसणार आहे. नावामुळं या चित्रपटाबद्दल चाहत्यांना उत्सुकता आहे. यात तापसी पन्नू त्याची नायिका आहे. या चित्रपटाचं बरचसं चित्रीकरण पूर्ण झालं आहे. चाहत्यांशी गप्पा मारताना शाहरुखनं दिग्दर्शक हिरानी यांचं कौतुक केलं आहे. ‘
डंकी’बद्दल आणखी माहिती सांग असं चाहत्यानं विचारताच शाहरुख म्हणाला, ‘मी स्वतःला नशीबवान समजतो कारण मला राजकुमार हिरानी यांच्यासारख्या दिग्दर्शकासोबत काम करण्याची संधी मिळाली. अनेकदा हा योग जुळून येता येता राहिला. एका वेगळ्या आणि हट के सिनेमातून मला चाहत्यांसमोर येण्याची संधी मिळाली आहे. या निमित्तानं चाहत्यांनाही काही वेगळं पाहायला मिळेल.’