या चित्रपटातील आकाशात भिडणाऱ्या ॲक्शन सीन्सने चित्रपटगृहांमध्ये खळबळ उडवून दिली. हृतिक रोशन आणि दीपिका पादुकोण यांचा अभिनय असलेल्या या चित्रपटाचे पहिल्या दिवसाचे कलेक्शन समोर आले आहे. या चित्रपटाने चांगली ओपनिंग केली आहे.
हृतिक रोशनच्या या चित्रपटाने त्याच्या मागील ‘विक्रम वेधा’ या चित्रपटाचा ओपनिंगचा (१०.५८ कोटी) विक्रम मोडला आहे, परंतु हा सिनेमा इतर सिनेमांच्या तुलनेत उत्तम ओपनिंग करु शकला नाही. हृतिकच्या ‘वॉर’ या चित्रपटाने ५१.६ कोटी रुपयांची (हिंदी) सुरुवात केली होती. २०१३ मध्ये रिलीज झालेल्या ‘क्रिश ३’ या चित्रपटाने २५.५० कोटींची कमाई केली होती. गेल्या वर्षी प्रदर्शित झालेल्या ‘पठाण’, ‘जवान’, ‘ॲनिमल’ आणि ‘गदर २’ यांसारख्या हिट चित्रपटांशी हृतिकच्या या चित्रपटाची तुलना केली, तर ‘फायटर’ ओपनिंगच्या बाबतीत खूपच मागे पडला आहे.
पहिल्या दिवशी देशभरात २२ कोटींचे कलेक्शन
sacnilk च्या अहवालानुसार, ‘Fighter’ ने पहिल्या दिवशी २,७९,३६७ तिकिटे विकली आणि सुमारे ८.४ कोटी रुपयांची अ‍ॅडव्हान्स बुकिंग केली. गुरुवार, २५ जानेवारी रोजी रिलीज झालेल्या या चित्रपटाने पहिल्याच दिवशी सुमारे २२.०० कोटी रुपयांचे निव्वळ कलेक्शन केले आहे. हा चित्रपट जगभरात उत्तम कलेक्शन करेल अशी अपेक्षा आहे.
‘फायटर’ जवळपास ४२०० स्क्रीन्सवर रिलीज
हा चित्रपट २D, ‘३D, IMAX ३D, ४DX ३D, ICE ३D आणि IMAX २D मध्ये रिलीज झाला आहे. हा चित्रपट सुमारे २५० कोटी रुपयांच्या बजेटमध्ये बनल्याचे म्हटले जाते. सिनेमा देशभरातील सुमारे ४२०० स्क्रीन्सवर प्रदर्शित झाला आहे.
चित्रपट पाहिल्यानंतर प्रेक्षक खूश
चित्रपट पाहून आलेल्यांनी या चित्रपटाचे खूप कौतुक केले. ‘फायटर’मध्ये हृतिक रोशनचे काम पाहून प्रेक्षक खूप खूश झाले आहेत. प्रत्येकाने हा देशभक्तीपर चित्रपट पाहावा, असे त्यांचे म्हणणे आहे.