सेवाकालावधीत विविध कामकाजाच्या ठिकाणी उल्लेखनीय कामकाज करणाऱ्या अधिकारी, कर्मचाऱ्यांना पोलिसपदक जाहीर केले जाते. यंदा अंबड पोलिस ठाण्याचे उपनिरीक्षक उत्तम सोनवणे यांना हे पदक जाहीर झाले आहे. त्यांना ३५ वर्षे सेवा कालावधीत सुमारे २०० बक्षिसे सात प्रशंसापत्रे मिळालेली आहेत. सध्या बॉम्बशोधक व नाशक पथकात सहायक उपनिरीक्षक म्हणून कर्तव्य बजावणाऱ्या नंदू उगले यांनाही पदक जाहीर झाले आहे. ते आतंरराष्ट्रीय स्तरावरील उत्कृष्ट धावपटू आहेत. त्यांनी अमेरिका, ऑस्ट्रेलिया, श्रीलंका, सिंगापूर, मलेशिया या देशांमध्ये मॅरेथॉन, शॉर्ट रन व लाँग रन स्पर्धेत सहभागी होऊन सुवर्ण, रौप्य व कांस्यपदके पटकावलेली आहेत. पोलिस महासंचालकांद्वारे सन्मानचिन्हाने त्यांना यापूर्वी सन्मानित करण्यात आले आहे.
सहायक उपनिरीक्षक अशोक काकड यांनादेखील पदक जाहीर झाले असून, ते सध्या पंचवटी पोलिस ठाण्यात कार्यरत आहेत. त्यांना २८१ बक्षिसे, नऊ प्रशंसापत्रे मिळालेली आहेत. वाहतूक विभागातील हवालदार नितीन संधान यांनाही पदक मिळाले आहे. त्यांनी ३३ वर्षांच्या सेवेत २२० बक्षिसे, पाच प्रशंसापत्रे मिळविली असून, २०२२ मध्ये ते पोलिस महासंचालकांच्या सन्मानचिन्हाने सन्मानित झाले आहेत. पोलिस आयुक्तालयातील चार पोलिस अधिकारी व अंमलदारांना उत्कृष्ट कामकाजामुळे गुणवत्तापूर्ण व उल्लेखनीय सेवेसाठी पदक जाहीर झाल्याने अधिकारी, कर्मचाऱ्यांत उत्साह दिसून आला.
…यांना मिळाली पदोन्नती
पोलिस आयुक्त संदीप कर्णिक यांनीदेखील शहर पोलिस दलातील अंमलदारांना २६ जानेवारीच्या पूर्वसंध्येला पदोन्नतीचे बक्षीस दिले. यामध्ये सहायक उपनिरीक्षकपदी यशवंत गांगुर्डे, अशोक वाजे, अनिल गांगुर्डे, मंगेश दराडे, अश्पाक तांबोळी यांचा समावेश आहे. हवालदारपदी संगीता कनोज, राहुल सोळरो, जॉर्ज कांबळे, आशिष गायकवाड, सारिका गवळी, संतोष ठाकूर, विलास पवार यांना पदोन्नती मिळाली आहे.