अदानी समूह बुटीबोरीतील औष्णिक वीजनिर्मिती प्रकल्प ३००० हजार कोटींना खरेदी करणार

म. टा. प्रतिनिधी, नागपूर : अदानी पॉवर लिमिटेड बुटीबोरी औद्योगिक क्षेत्रातील बुटीबोरी थर्मल पॉवर प्लांट घेण्याचा विचार करत आहे. या प्रकल्पाची वीज निर्मिती क्षमता ६०० मेगावॅट आहे. ३००० कोटींमध्ये हा प्रकल्प घेण्याची तयारी अदानी पॉवर लिमिटेडने दर्शविल्याची माहिती सुत्रांनी दिली.

बुटीबोरी थर्मल पॉवर प्लांट हा विदर्भ पॉवर इंडस्ट्रीजचा भाग आहे. विदर्भ पॉवर इंडस्ट्रीज ही रिलायन्स पॉवरची उपकंपनी आहे. विदर्भ इंडस्ट्रीज पॉवर लिमिटेड अंतर्गत हा प्रकल्प घेण्यासाठी अदानी पॉवर सीएफएम ॲसेट रिकन्स्ट्रक्शन कंपनी (सीएफएम एआरसी) सोबत बोलणी करत आहे. सीएफएम एआरसीने १,२६५ कोटी रुपयांची सर्व कर्जे घेतली आहेत. सध्या ही कंपनी या प्रकल्पासाठी कर्ज देणारी एकमेव कंपनी आहे.
Adani Power Plant: अदानी समूहाला मोठा दिलासा; सरकारने नियम बदलला, आता थेट भारतीय बाजारात उतरणार

सुरुवातीला या प्रकल्पाची किंमत सुमारे ६ हजार कोटी रुपये होती. मात्र, नंतर वीज निर्मिती बंद झाली. त्यामुळे प्लांटचे मूल्यांकन कमी झाले आहे. त्यानुसार, अदानी पॉवर लिमिटेडने हा प्रकल्प विकत घेण्यास उत्सुकता दर्शविली आहे. यापूर्वी, सज्जन जिंदाल यांच्या जेएसडब्ल्यू एनर्जी लिमिटेडने सुरुवातीला हा प्रकल्प घेण्याची तयारी दर्शविली होती. मात्र, प्राथमिक चर्चांनंतर जेएसडब्ल्यूने खरेदीसंदर्भात फारसा रस दाखविला नाही. हा प्रकल्प २०१९ पासून आर्थिक तंगीचा सामना करतोय. ज्या कंपन्यांनी यांना कर्ज दिले होते त्यांनी विदर्भ इंडस्ट्रीजला दिवाळखोर जाहीर करत प्रकल्पाच्या लीलावासाठी अर्ज केला आहे. परंतु, प्राप्त माहितीनुसार, अद्याप ही कंपनी दिवाळखोरीत निघोलेली नाही.
Hydropower : राज्यात वीजेची कमतरता भरुन निघणार, पंप स्टोरेज पद्धतीने वीजनिर्मितीला चालना; पवना अर्जुनेवर जलविद्युत प्रकल्प

…तर उद्योगांचे स्थलांतरण थांबेल

बुटीबोरी थर्मल पॉवर प्लांट अदानी पॉवर लिमिटेड घेणार असल्याची चर्चा गेल्या काही वर्षांपासून सुरू आहे. ऊर्जा निर्मितीच्या क्षेत्रात अदानी प्रस्थापित नाव आहे. त्यांनी हा प्रकल्प हाती गेल्यास त्याचा विदर्भाला फायदा होईल. रिलायन्सने जेव्हा हा प्रकल्प सुरू केला होता तेव्हा त्यांना ग्रुप कॅप्टिव्ह पॉवर प्लांट म्हणून मान्यता दिली होती. त्यामुळे बुटीबोरी आणि जवळील परिसरातील औद्योगिक युनिट्ससाठी स्वस्त दरात वीज उपलब्ध होईल, अशी अपेक्षा होती. पण, नंतर कंपनीने ती कॅटेगरी बदलवून घेतली.

आता अदानी पॉवर लिमिटेडने जुन्या कॅटेगरीनुसार प्रकल्प सुरू करावा. त्यामुळे या भागातील औद्योगिक युनिट्सला स्वस्तात वीज उपलब्ध होईल आणि येथून उद्योगांचे स्थलांतरण थांबेल, अशी भावना बुटीबोरी मॅन्युफॅक्चरर्स असोसिएशनचे माजी अध्यक्ष नितीन लोणकर यांनी व्यक्त केली.