The Sabarmati Report: विक्रांत मेस्सीच्या सिनेमाकडे प्रेक्षकांनी फिरवली पाठ, सात दिवसांत इतक्याच कोटींची कमाई

एकता कपूर हिनं द साबरमती रिपोर्ट ची निर्मिती केली आहे. त्यामुळं सिनेमाची चर्चा गेल्या काही महिन्यांपासून सुरू होती. पंतप्रधान नरेंद्र मोदी यांनी देखील ट्विट करत सिनेमाचं कौतुक केलं होतं. पण सिनेमाची कमाई मात्र समाधानकारक नसल्याचं दिसून येत आहे.

सॅकनिल्कच्या रिपोर्टुनुसार सिनेमानं सातव्या दिवशी १.१० कोटींची कमाई केली आहे. सिनेमाचं एकूण कलेक्शन हे आता ११.४५ कोटी झालं आहे. चित्रपटानं पहिल्या दिवशी १.२५ कोटी, दुसऱ्या दिवशी २.१ कोटी, तिसऱ्या दिवशी तीन कोटी, चौथ्या दिवशी १.१५ कोटी , पाचव्या दिवशी १.३ कोटी आणि सहाव्या दिवशी १.५५ कोटींची कमाई केली होती.

‘द साबरमती रिपोर्ट ,सिनेमाला मध्य प्रदेश, छत्तीसगढ़ आणि हरियाणा टॅक्स फ्री करण्यात आलं होतं. असं असताना कमाईत वाढ होताना दिसत नाहीये. आता दुसऱ्या आठवड्यात सिनेमा किती कमाई करणार, यावर सिनेमाचं भविष्य अवलंबून आहे. कारण नंतर मोठे सिनेमा बॉक्स ऑफिसवर एन्ट्री करणार आहेत.

गुजरात इथं घडलेल्या गोध्रा हत्याकांडावर हा सिनेमा बेतला आहे.गोध्रा जळीतकांड आणि त्यानंतर गुजरातमध्ये उसळलेल्या दंगली हा देशाच्या इतिहासातील एक दुर्दैवी घटनाक्रम आहे. त्या वेळी नक्की काय घडलं, या घटना एका पत्रकाराच्या दृष्टिकोनातून मांडल्या आहेत. गोध्रा जळीतकांड आणि त्यानंतरची गुजरातमधली स्थिती याबाबत आतापर्यंत प्रसार माध्यमांमधून सांगण्यात आलेल्या गोष्टीच इथं मांडण्यात आल्या आहेत. अंगावर येणारं, दाहक वास्तव मांडण्यासाठी आवश्यक असलेल्या सशक्त पटकथेचा अभाव वारंवार जाणवत राहतो.