कंगना रणौतचा ‘इमर्जन्सी’ हिट की फ्लॉप? पहिल्या दिवशी बॉक्स ऑफिसवर इतकीच कमाई

इमर्जन्सी सिनेमा काल म्हणजेच १७ जानेवारी रोजी प्रदर्शित झाला. या सिनेमाचं पहिल्या दिवशीचं बॉक्स ऑफिस कलेक्शन आता समोर आलं आहे.देशात काही ठिकाणी इमर्जन्सी चित्रपटावर बंदी आहे. त्याचा परिणाम बॉक्स ऑफिस कलेक्शनवर झाल्याचं पाहायला मिळत आहे.

कंगनाच्या इमर्जन्सी चित्रपटानं पहिल्या दिवशी बॉक्स ऑफिसवर फक्त अडीच कोटींच्या जवळपास कमाई केल्याचं पाहायला मिळतंय.

९९ रुपये किंमत
तर इमर्जन्सी सिनेमा प्रदर्शित झाल्या नंतर पहिल्याच दिवशी खास ऑफरही होती. नॅशनल सिनेमा लव्हर्स डे निमित्तानं सिनेमाचं तिकीट हे ९९ रुपये इतकं होतं. पण याचा फायदा सिमेला झाला नाहीये.

दुपारच्या शोची १०-१३ टक्के तिकीटांची विक्री झाली होती. तर सायंकाळी आणि रात्री ३६ टक्के तिकीटांची विक्री झाली होती.इमर्जन्सीनं २.५० कोटींचं ओपनिंग केलं असलं तरी, कंगनाच्या मागील सिनेमांपेक्षा हे जास्त आहे. २०२३मध्ये प्रदर्शित झालेल्या कंगनाच्या तेजस सिनेमानं १.२५ कोटींची कमाई केली होती.

काय हे सिनेमाचं कथानक?
कंगनाची ही बहुचर्चित ‘इमर्जन्सी’ ही कलाकृती देशाच्या इतिहासातील सर्वांत वादग्रस्त प्रकरणांपैकी एकावर प्रकाश टाकते, अर्थात तत्कालीन पंतप्रधान इंदिरा गांधी यांनी घोषित केलेली १९७५ची आणीबाणी.

राजकीय अशांतता आणि वाढता विरोध या पार्श्वभूमीवर आणीबाणीची बीजं पेरली गेली. निवडणूक गैरव्यवहारांमुळं इंदिरा गांधींचा १९७१च्या निवडणुकीतला विजय रद्द ठरविणाऱ्या अलाहाबाद उच्च न्यायालयाच्या निर्णयानंतर त्यांच्या पायाखालची राजकीय जमीन सरकू लागली. या निकालामुळं त्यांच्या राजीनाम्याची मागणी झाली; ज्यामुळं भ्रष्टाचार आणि गैरकारभाराविरुद्ध व्यापक निषेध करण्यात आला.

वाढत्या दबावाला तोंड देत इंदिरा गांधींनी सत्तेवर आपली पकड मजबूत करणं पसंत केलं. २५ जून १९७५ रोजी त्यांनी अंतर्गत गडबडीचे कारण देत भारतीय संविधानातलं कलम ३५२ लागू केलं; त्यानंतरचा २१ महिन्यांचा कालावधी असा होता ज्या दरम्यान नागरी स्वातंत्र्यावर प्रतिबंध लादण्यात आले. राजकीय विरोधकांना तुरुंगात टाकण्यात आलं आणि प्रसारमाध्यमांची गळचेपी करण्यात आली. एक लोकशाही देश हुकूमशाही राजवटीत बुडून गेला.