Chhaava रीलिजनंतर ३७व्या दिवशीही विकी कौशलचे राज्य; बॉक्स ऑफिसवर जवळपासही नाहीत जॉन अब्राहम-गॅल गॅडोट

By tejpolicetimes On Mar 23, 2025

Chhaava Box Office Collection Day 37: १४ फेब्रुवारी रोजी रीलिज झालेला ‘छावा’ सिनेमा एक महिन्याहून अधिक काळ बॉक्स ऑफिसवर राज्य करतो आहे. नव्याने रीलिज झालेले चित्रपटही विकी कौशलच्या या सिनेमाला टक्कर देऊ शकलेले नाहीत.

हायलाइट्स:
३७व्या दिवशीही ‘छावा’ची दणक्यात कमाई 
जॉन अब्राहमचा ‘द डिप्लोमॅट’ आणि गॅल गॅडोटचा ‘स्नो व्हाइट’ पडले मागे 
६०० कोटींच्या अगदी जवळ येऊन पोहोचली कमाई

महाराष्ट्र टाइम्स.कॉम

मुंबई: छत्रपती संभाजी महाराज यांच्या जीवनावर आधारित असणारा ‘छावा’ सिनेमा विविध कारणांमुळे चर्चेत आला. चित्रपटाचे बॉक्स ऑफिस कलेक्शन त्यापैकी एक महत्त्वाचे कारण आहे. भारतातील बॉक्स ऑफिसवर ‘छावा’ची कमाई ६०० कोटींच्या अगदी जवळ येऊन पोहोचली आहे. आणखी काही दिवस सिनेमागृहांमध्ये हा चित्रपट राहिल्यास हा टप्पादेखील ओलांडला जाईल. जाणून घ्या ३७ दिवसांनी ‘छावा’ची कमाई किती झाली आहे? विकी कौशल, रश्मिका मंदाना आणि अक्षय खन्ना या कलाकारांच्या ‘छावा’मध्ये मुख्य भूमिका आहेत. याशिवाय मराठी मनोरंजन विश्वातील अनेक आघाडीचे कलाकार चित्रपटाच असून मराठमोळे दिग्दर्शक लक्ष्मण उतेकर यांनी या चित्रपटाचे दिग्दर्शन केले. १४ फेब्रुवारी रोजी रीलिज झालेल्या चित्रपटाचे बजेट १२५ कोटी रुपये होते आणि हे बजेट केव्हाच वसूल झाले होते. सिनेमा रीलिज झाल्यानंतर झालेली कमाई आणि आता होत असणारी कमाई यामध्ये बरीच तफावत पाहायला मिळते. सुरुवातीची आकडेवारी खूपच जास्त होती आणि आता त्यात घसरण झाली आहे. मात्र सिनेमा आता सहाव्या आठवड्यात पोहोचला असल्यानेे त्या दृष्टीकोनातून शुक्रवारी आणि शनिवारी बऱ्यापैकी चांगली कमाई झाली.

Sacnilk ने दिलेल्या वृत्तानुसार, ३६व्या दिवशी म्हणजेच सहाव्या शुक्रवारी (२१ मार्च २०२५) २.१० कोटींची कमाई झाली, तर ३७व्या दिवशी म्हणजे सहाव्या शनिवारी (२२ मार्च २०२५) ३.७० कोटींची कमाई झाली. शनिवारची आकडेवारी सुरुवातीची आहे, यामध्ये आणखी बदल पाहायला मिळू शकतो. यानंतर एकूण ३७ दिवसात ‘छावा’ने ५७८.६५ कोटींचा गल्ला कमावला आहे.

धनश्री वर्माला पापाराझींनी चहलसोबतच्या घटस्फोटाबद्दल विचारलंच! म्हणाली- ‘आधी गाणं ऐका…’

‘छावा’ने प्रतिस्पर्धी सिनेमांना टाकले मागे

गेल्या शुक्रवारी जॉन अब्राहमचा ‘द डिप्लोमॅट’ आणि या शुक्रवारी गॅल गॅडोटचा ‘स्नो व्हाइट’ प्रदर्शित झाला, परंतु दोघांपैकी कोणताही सिनेमा ‘छावा’च्या बॉक्स ऑफिस कलेक्शनच्या जवळपास पोहोचू शकला नाही. जॉनच्या चित्रपटाला प्रेक्षक आणि समीक्षकांकडून भरपूर कौतुक मिळाले आणि सिनेमाची सुरुवातही चांगली झाली, परंतू तरीदेखील हा चित्रपट ‘छावा’ला मागे टाकू शकला नाही. शनिवारी, ‘द डिप्लोमॅट’च्या नवव्या दिवशी आणि ‘स्नो व्हाइट’च्या दुसऱ्या दिवशी, या चित्रपटांनी अनुक्रमे २.३५ कोटी आणि १.०६ कोटी रुपयांचे कलेक्शन केले.

लेखकाबद्दलजान्हवी भाटकरजान्हवी भाटकर, महाराष्ट्र टाइम्स ऑनलाइनमध्ये डिजिटल कंटेंट प्रोड्युसर म्हणून कार्यरत. डिजिटल आणि टेलिव्हिजन मीडियामध्ये ५ वर्षांचा अनुभव. ‘न्यूज १८ लोकमत’मधून डिजिटल मीडियामध्ये काम करण्यास सुरुवात. ऑनलाइन माध्यमांमध्ये ३ वर्ष कार्यरत. मनोरंजन, लाइफस्टाइल आणि अर्थ विषयात आवड.… आणखी वाचा

Source link