Halloween Day History In Marathi हॅलोवीन म्हणजे काय? वाचा, उत्सवामागील मान्यता व रंजक गोष्टी

भारतीय संस्कृती आणि परंपरेमध्ये जसा पितृपक्ष पाळून पितरांचे स्मरण करण्याची प्रथा आहे. त्याच धर्तीवर ख्रिस्ती बांधव हॅलोवीन साजरा करतात. दरवर्षी ३१ ऑक्टोबर या दिवशी हॅलोवीन साजरे केले जाते. आताच्या घडीला सोशल मीडिया, हॉलिवूडचे चित्रपट, वेबसीरीज यांमुळे हॅलोवीनबाबत भारतीयांच्या मनातही उत्सुकता वाढली असल्याचे दिसून येते. हॅलोवीन म्हणजे काय? या उत्सवाविषयीच्या मान्यता आणि काही रंजक गोष्टी जाणून घेऊया…

हॅलोवीन उत्सव कसा सुरू झाला?

हॅलोविन किंवा हेलोवीन शब्द १७४५ पासून वापरला जातो. भारतामध्येही अगदी क्वचित काही मंडळी हॅलोवीन सेलिब्रेशन करतात. हॅलोवीन सेलिब्रेशन हे मूळतः इंग्लंड आणि आर्यलंड येथील आहे. याच भागात या प्रथेला सुरूवात झाली. पुढे जगाच्या विविध भागात जसा आयरिश समाज पसरत गेला, तसे याचे उत्सव साजरे करण्याचे स्वरुप आणि रंग बदलत गेले, असे म्हटले जाते. युरोपीन देशात प्रामुख्याने सॅल्टिक समाजातील मान्यतेनुसार, हॅलोवीन दरम्यान मृत व्यक्तींचे आत्मे त्यांच्या कुटुंबीयांना भेटायला येतात. त्यामुळे भूतांची- प्रेतांची वेशभूषा करण्याची प्रथा सुरू झाली, असे सांगितले जाते.

हॅलोवीन उत्सवाच्या पद्धती

अमेरिकेमध्ये हॅलोवीन मोठ्या प्रमाणात साजरे केले जाते. तेथे भोपळ्यांना भयावह वाटणार्‍या आकृतीमध्ये कापून त्यामध्ये दिवे सोडले जातात. याला ‘जॅक ओ लॅटन्स’ असेही म्हटले जाते. हॅलोवीनमध्ये काळा आणि नारंगी रंग प्रामुख्याने वापरला जातो. नारंगी रंग हा शक्तीचे प्रतीक मानला गेला आहे. युरोपात ऑक्टोबरच्या शेवटच्या टप्प्यात हिवाळा आणि उन्हाळा यादरम्यानचा हा काळ असल्याने निसर्गातही सारी वृक्ष, पाने पिवळी, नारंगी रंगाची झालेली असतात. तर काळा रंग भय, मृत्यू यांचे प्रतीक मानला गेला आहे. त्यामुळे पूर्वजांच्या स्मरणासाठी साजऱ्या केल्या जाणाऱ्या या उत्सवात नारंगी आणि काळ्या रंगाचा वापर केला जातो, असे सांगितले जाते.