Tej Police Times
अहमदनगर : गुजरातमध्ये विधानसभा निवडणुकीची धामधूम सुरू आहे. या निवडणुकीसाठी भाजपने नुकताच आपला जाहीरनामा प्रकाशित केला. येत्या पाच वर्षांत २० लाख तरुणांना नोकरी आणि रोजगार देण्याची घोषणा त्यामध्ये करण्यात आली आहे. यावरून भाजपवर निशाणा साधताना राष्ट्रवादी काँग्रेसचे आमदार रोहित पवार यांनी महाराष्ट्रातून पळवलेल्या प्रकल्पांकडे लक्ष वेधलं आहे. या प्रकल्पांच्या आधारेच गुजरातमध्ये नोकऱ्या देण्याची घोषणा करण्यात येत असल्याचे सांगून त्याचे आकडेही रोहित पवार यांनी नमूद केले आहेत.
‘गुजरात निवडणुकीसाठी महाराष्ट्र सरकारने केला ‘त्याग’ आणि इथल्या युवांच्या वाट्याला आले भोग,’ असंच यानिमित्ताने म्हणावं लागेल, असा टोलाही रोहित पवार यांनी लगावला आहे.
दरम्यान, महाराष्ट्रातील उद्योगधंद्यांच्या मुद्द्यावरून गेल्या काही दिवसांपासून रोहित पवार हे सातत्याने राज्य सरकारला लक्ष्य करत आहेत. त्यामुळे सत्ताधारी गोटातून रोहित पवार यांना काही प्रत्युत्तर दिलं जातं का, हे पाहणं महत्त्वाचं ठरणार आहे.