सगळ्यांसमोर ती तडफडत होती, मात्र कोणीच मदतीला धावलं नाही; ३० वर्षीय तरुणीने सोडले प्राण

धुळे : शिरपूर येथील सावळदे तापी पुलावरून ३० वर्षीय विवाहितेने चप्पल आणि ओढणी पुलावरच काढून ठेवत उडी मारून आत्महत्या केली आहे. उडी मारल्यानंतरही सदर तरुणी बराच वेळ आपला जीव वाचवण्याचा प्रयत्न करत होती. परंतु त्यावेळी बघ्यांपैकी कोणीही या तरुणीला वाचवण्याचा प्रयत्नही केला नाही. फक्त पुलावरून तिला सूचना देण्यात व व्हिडिओ काढण्यातच बघ्यांनी धन्यता मानली आहे.

मिळालेल्या प्राथमिक माहितीनुसार, आज दुपारी २ ते ३ वाजताच्या सुमारास मुंबई-आग्रा राष्ट्रीय महामार्ग क्रमांक ३ वरील शिरपूर तालुक्यातील सावळदे तापी नदी पुलावरून तरुणीने उडी घेतली. या घटनेचा पुलावरुन जाणाऱ्या एका प्रवाशाने व्हिडीओ काढला. मात्र आत्महत्या करणाऱ्या या तरुणीला सूचना देण्याऐवजी तिचे प्राण वाचवण्यासाठी बघ्यांपैकी कोणी पुढे सरसावलं असतं तर संबंधित तरुणीचे प्राण वाचू शकले असते. परंतु बघणाऱ्यांपैकी कोणीही तिला वाचवण्याचा कुठल्याही प्रकारचा प्रयत्न केला नाही.

बारामतीत मेडिकल कॉलेजमधील तरुणासोबत धक्कादायक घटना; उसाच्या शेतात नेऊन नग्न केलं आणि…

घटनास्थळी पोलीस प्रशासन दाखल झाले असून घटनास्थळावर तरुणीची चप्पल व ओढणी आढळून आली. संबंधित तरुणीची ओळख पटली असून ही तरुणी शिंदखेडा तालुक्यातील हातनूर येथील असून, या तरुणीने टोकाचं पाऊल का उचललं, याचं कारण अद्याप समजू शकलं नाही. सदर तरुणीच्या मृतदेहाचे शोधकार्य सुरू आहे, परंतु अद्यापही या तरुणीचा मृतदेह सापडला नसल्याचे प्रशासनाकडून सांगण्यात येत आहे.

दरम्यान, विवाहित तरुणीच्या आत्महत्येने शहरात खळबळ उडाली असून याप्रकरणी पोलीस अधिक तपास करत आहेत.