अन् तिने हल्ला परवून लावला; महिलेने दाखवलेल्या धाडसामुळं वाचला ३ वर्षांच्या चिमुकल्याचा जीव

बुलडाणाः तालुक्यातील पोटळी शेत शिवारात ८ डिसेंबर रोजी दुपारी चार ते पाच वाजेच्या सुमारास रानडुकराच्या कळपाने हैदोस घातला होता. यावेळी तिथेच खेळत असलेल्या रानडुकराने हल्ला करून एका महिलेसह मुलाला जखमी केले. मात्र, एका रणरागिणीने रानडुक्करांचा हा हल्ला मोठ्या शिताफिने परतून लावला आहे. त्यांच्यामुळं बालकाचा जीव बचावला आहे. (Buldhana)

वंदनाबाई खरोटे असं या महिलेचे नाव असून त्यांनी दाखवलेल्या धाडसामुळं बालकाचे प्राण वाचले आहेत. यामध्ये तो बालक व महिला गंभीर जखमी झाली आहे. जखमीवर सध्या खाजगी रुग्णालयात उपचार सुरू आहेत.

मिळालेल्या माहितीनुसार, ८ डिसेंबर रोजी सुवर्णाताई भागवत हूबर्डे ही महिला तिचा मुलगा यश (वय ३ वर्ष) याच्यासह निनाजी हूबर्डे यांच्या शेतात कापूस वेचत होती. वंदना नागो खराटे यादेखील शेतात कापूस वेचण्याचे काम करत होत्या. दुपारी चार ते साडेचारच्या सुमारास अचानक रानडुक्कराने मुलावर हल्ला केला. त्यावेळी त्याच्या आईने आरडा ओरडा करत आजूबाजूला माणसं बोलवण्याचा प्रयत्न केला.

वाचाः आर्थिक अडचण आता दूर होणार; शेततळ्यासाठी शेतकऱ्यांना मिळणार आता इतकी रक्कम

शेतातच काम करत असलेल्या वंदनाताई यांनी त्यांचा आवाज ऐकला आणि स्वतःच्या जीवाची पर्वा न करता त्या बालकाला रानडुक्कराच्या तावडीतून सोडवले. पण यावेळी रानडुक्कराच्या हल्ल्यात त्या सुद्धा गंभीर जखमी झाल्या आहेत.

महिलांचा आवाज ऐकून बाजूच्या शेतात काम करत असलेले सचिन तायडे या युवकांने लगेचच त्यांच्याकडे धाव घेत त्यांना रानडुक्कराच्या तावडीतून सोडवण्याचा प्रयत्न केला. माणसं जमू लागल्यावर मात्र त्याचवेळी त्या रानडुक्कराने शेतातील भारसू कळस्कर यांची वगार ,विष्णू गोपी यांची वासरू, आनंद पाचपुरे यांची वासरू, शिवाजी सपकाळ यांच्या गाईला जखमी केले.

वाचाः करोना आणि गोवरनंतर आणखी एका आजाराने वाढवले महाराष्ट्राचे टेन्शन, राज्यातील दुर्गम भागात…

या घटनेची माहिती मिळताच सामाजिक कार्यकर्ते रवी खंडारे यांनी वन विभाग तसेच तहसीलदार यांना माहिती देऊन त्यांना आर्थिक मदत करून बालकाचे प्राण वाचवणाऱ्या त्या रणरागिणीचा सन्मान करावा अशी मागणी केली आहे. दरम्यान या घटनेमुळे परिसरात भीतीचे वातावरण पसरले आहे.