नव्या समीकरणाची नांदी; वंचित आघाडी महाविकास आघाडीत सामील होणार? ठाकरे गटाच्या नेत्याने दिले स्पष्ट संकेत

म. टा. खास प्रतिनिधी, मुंबई: वंचित बहुजन आघाडी महाविकास आघाडीत सामील होण्याबाबत हालचालींना पुन्हा एकदा वेग आला आहे. या संदर्भात शिवसेना उद्धव बाळासाहेब ठाकरे पक्ष आणि वंचित बहुजन आघाडीच्या नेत्यांची विशेष बैठक सोमवारी शिवसेना भवन येथे पार पडली. या बैठकीनंतर वंचित बहुजन आघाडी लवकरच महाविकास आघाडीमध्ये येईल, असा विश्वास शिवसेना नेते सुभाष देसाई यांनी व्यक्त केला आहे.

शिवसेना उद्धव बाळासाहेब ठाकरे आणि वंचित बहुजन आघाडी युतीसंदर्भातील चर्चेची फेरी शिवसेना भवन येथे सोमवारी पार पडली. या वेळी देसाई आणि वंचित बहुजन आघाडीचे मुंबई प्रदेश अध्यक्ष अबुल हसन खान यांच्यात सविस्तर चर्चा झाली. युती संदर्भातील चर्चेची अंतिम फेरी पार पडल्यानंतर लवकरच दोन्ही पक्षांचे प्रमुख एकत्र येऊन युतीची अधिकृत घोषणा करतील, असे खान यांनी या वेळी नमूद केले.

गेल्या काही दिवसांपासून महाविकास आघाडीत चौथा पक्ष समाविष्ट होणार याची चर्चा सुरू होती. उद्धव ठाकरे व प्रकाश आंबेडकर यांच्या भेटीही घडत होत्या. दोन्ही नेत्यांच्या भेटीत सकारात्मक निर्णय झाला असल्याचं बोललं जात आहे. मात्र, आता काल झालेल्या बैठकीनंतर वंचित आघाडी महाविकास आघाडीत सामील लवकरच सामील होणार याचे संकेत मिळाले आहेत.

दरम्यान, उद्धव ठाकरे आणि प्रकाश आंबेडकर प्रबोधनकार. डॉट. कॉम या वेबसाईटच्या रीलाँचिंगच्या निमित्तानं एकत्र आले होते. उद्धव ठाकरेंनी देशातील सध्याच्या राजकीय स्थितीचा दाखला देत लोकशाही वाचवण्यासाठी आपण एकत्र यायला हवं, असं म्हणत वंचित सोबत आघाडीसाठी सकारात्मक असल्याचे संकेत दिले होते. यानंतर वंचितच्या प्रदेशाध्यक्ष रेखा ठाकूर यांनी वंचित बहुजन आघाडी शिवसेनेसोबत आघाडीसाठी तयार असल्याचं म्हटलं होतं. मात्र, वंचितनं महाविकास आघाडीतील काँग्रेस आणि राष्ट्रवादीसंदर्भात प्रश्न उपस्थित केले होते.