उरणः मोठ्या विश्वासाने खोली भाड्याने दिली, महिनाभरानंतर भाडेकरुच्या घरात आढळला महिलेचा मृतदेह

म. टा. वृत्तसेवा, उरणः शहरानजीकच्या गावातील घरात सुमारे ७५ वर्षीय वृद्ध महिलेची हत्या करण्यात आली आहे. यामध्ये, वृद्ध महिलेचे हात आणि पाय बांधून तिचा मृतदेह हा खोलीतील शौचालयात ठेवण्यात आला होता.

उरण तालुक्यातील बोकडविरा गावातील ललित ठाकूर या त्यांच्या घरात एकट्याच राहत होत्या. तर, त्यांच्या घरातील दोन खोल्या या भाड्याने देण्यात आल्या असून गेल्या एक महिन्यापासून नवीन भाडेकरू ठेवण्यात आला होता. तर, ललिता ठाकूर या गावातील अंगणवाडीमध्ये काम करून उदरनिर्वाह करत होत्या.

मंगळवारी सकाळी ललिता या अंगणवाडी शाळेत पोहचल्या नसल्याने शाळेतील महिला या त्यांना शोधण्यासाठी घरी पोहचल्या असता त्यांच्या घराला कुलूप असल्याचे दिसून आले होते. यामुळे, त्यांच्या नातेवाईकांनी त्यांना शोधण्याचा प्रयत्न केला असता त्या कुठेही आढळून आल्या नाहीत. याचवेळेस, घराच्या बाजूच्या भाडोत्री असलेल्या अमोल शेलार याच्या घरात पाहणी केली असता ललिता यांचे हात-पाय बांधून ठेवण्यात आल्याचे दिसून आले होते.

यामुळे, या घटनेची माहिती पोलीसांना देण्यात आली असता श्वान पथक आणि फिंगरप्रिंट तज्ञांना पाचारण करण्यात आले होते. यावेळेस, ललिता ठाकूर या बेशुद्ध अवस्थेत असल्याने त्यांना तातडीने उरण येथील सरकारी रुग्णालयात नेण्यात आले असता त्यांना मृत घोषित करण्यात आले.

यामुळे, ललिता यांची हत्या केली असल्याचा संशय व्यक्त करण्यात येत असून हत्येचे कारण आणि आरोपीचा शोध घेण्याचा प्रयत्न करण्यात येत असल्याचे पोलीस निरीक्षक सुनील पाटील यांनी सांगितले. तर, ललिता यांच्या घरातील भाडेकरू फरार असून त्याचा शोध घेण्यात येत आहे.