बसमध्ये ४० प्रवासी, रात्री पुण्याला जाताना चालकाला हार्टअटॅक, पण नशीबाने साथ दिली अन्…

सोलापूरः एसटी बस चालवत असतानाच रात्रीच्या वेळेस चालकाला अचानक हृदयविकाराचा झटका आला. स्टेअरिंगवरील नियंत्रण सुटल्याने एसटी बस पुलाच्या संरक्षक लोखंडी गार्डला धडकल्याचा आवाज आला. प्रवाशांनी पाहिले तर चालकाने मान टाकलेली होती. प्रवाशांमध्ये आरडाओरड सुरू झाली. हा थरार घडला आहे सोलापूर- पुणे महामार्गावर पळसदेव हद्दीत. अचानक

चालकाला हृदयविकाराचा झटका आल्यानंतर एका तरुण प्रवाशाने धाडस करत बसच्या स्टेअरिंगचा ताबा घेतला. ड्रायव्हिंगच्या अनुभवाचा फायदा घेत हॅण्डब्रेकवर बस थांबवली अन् सर्वांचाच जीव भांड्यात पडला. यामुळे गाडीतील ४० प्रवाशांचे जीव वाचले. तरुणाने धाडस दाखवत एसटीच स्टेअरिंग हातात घेत प्रवाशांचा जीव वाचवल्याने सर्व स्तरातून कौतुक होत आहे.

अन्यथा मोठा अनर्थ झाला असता

रविवार, ८ जानेवारी रोजी उदगीर आगारामधून पुण्याकडे निघालेली बस क्रमांक (एमएच २४, एयू ८०६५) या गाडीत जवळपास ३५ ते ४० प्रवासी होते. चालकाला हृदयविकाराचा झटका आल्यानंतर बस रस्त्याच्या बाजूला असलेल्या गार्डला धडकून थांबली. एसटी बस जर नियंत्रणात आली नसती तर महामार्गाच्या कडेला असलेल्या ट्रान्सफॉर्मरवर जाऊन किंवा उजनी जलाशयाच्या बॅकवॉटरच्या पाण्यात जाऊन पलटी झाली असती. सुदैवाने बसमधील प्रवाशाने धाडस दाखविल्यामुळे बस थांबली अन प्रवाशांचे जीव वाचले.

वाचाः शिर्डीला निघालेल्या ठाण्यातील भक्तांच्या बसला ट्रकची भीषण धडक; दहा जणांचा मृत्यू

एसटी बस चालवत असताना चालकाला हार्ट अटॅक आला

इंदापूर ओलांडून एसटी बस सोलापूर पुणे राष्ट्रीय महामार्गावरून पळसदेव गावातून जात होती. रात्री साडेदहा ते अकराच्या दरम्यान बसचालक गोविंद सूर्यवंशी यांना अचानक हृदयविकाराचा झटका आला. त्यामुळे ते चालू बसच्या स्टेअरिंगवरच कोसळले. त्यांचे बसवरील नियंत्रण सुटल्यामुळे बस महामार्गाच्या कडेला लावलेल्या लोखंडी गार्डवर धडकली. याच गाडीतून पुण्याकडे निघालेले प्रवासी सुधीर मारुती रणे (रा.करकंब, ता. पंढरपूर) यांनी धाडसाने चालकाच्या केबिनमध्ये जाऊन स्टेअरिंग स्वतःच्या ताब्यात घेतले आणि बसवर नियंत्रण मिळवत ती एका जागी उभी केली. त्यामुळे मोठा अपघात रोखण्यात त्यांना यश आले.

वाचा ३५ बँकांचे १०१ एटीएम कार्ड घेऊन फिरायचे, ठाण्यात धुडगूस घातलेल्या टोळीच्या अखेर मुसक्या आवळल्या

बस सुरक्षित थांबल्यावर प्रवाशांनी सुटकेचा सुस्कारा सोडला. प्रवासी सुधीर रणे व वाहक संतोष गायकवाड यांनी बसचालक गोविंद सूर्यवंशी यांना गाडीमध्येच बोनेटवर झोपवले.

एसटी ड्रायव्हरला वेळेत रुग्णालयात दाखल केले

एसटीमधील प्रवासी सुधीर रणे यांना खासगी बसचालक म्हणून काम करण्याचा १० ते १२ वर्षांचा अनुभव आहे. यामुळे त्यांनी रुग्णवाहिकेची वाट न पाहता स्वतः बस चालवत भिगवणपर्यंत गाडी नेली. बसचालकाला भिगवण येथील खासगी रुग्णालयामध्ये दाखल करण्यात आले. यामुळे बसचालक गोविंद सूर्यवंशी यांना वेळेत उपचार मिळाल्याने जीवनदान मिळाले.

वाचाः प्रियकराला २ तरुणांचा घेराव, तरुणीने कैची दाखवून संरक्षण केलं, मात्र नंतर विपरीत घडलंच!