जेव्हा कम्युनिस्ट नेते आडम मास्तर फडणवीसांची स्तुती करतात…!

सोलापूर : जिल्ह्याचे पालकमंत्री आणि राज्याचे महसूल मंत्री राधाकृष्ण विखे पाटील यांनी शुक्रवारी सायंकाळी रेनगरला भेट देऊन या प्रकल्पाच्या अनुषंगाने आढावा बैठक घेतली. यावेळी त्यांच्यासमोर माकपचे माजी आमदार नरसय्या आडम यांनी प्रकल्पाचे सादरीकरणही केले. प्रधानमंत्री आवास योजनेअंतर्गत साकारत असलेल्या रे नगर गृहप्रकल्पाकडे खुद्द पंतप्रधान नरेंद्र मोदी यांचे विशेष लक्ष आहे. या प्रकल्पासाठी यापूर्वी शरद पवार-सोनिया गांधी यांच्यापर्यंत गेलो मात्र त्यांना जे जमले नाही ते देवेंद्र फडणवीस यांनी करून दाखवले. या प्रकल्पास संपूर्ण सहकार्याची त्यांची भूमिका आहे. देवेंद्र फडणवीस यासारखा मुख्यमंत्री आजतागायत पहिला नाही, असे आडम म्हणाले.

मुख्यमंत्री एकनाथ शिंदे व उपमुख्यमंत्री फडणवीस यांनी सोलापूरला यावं : नरसय्या आडम

रे नगर गृहप्रकल्प 31 डिसेंबर 2024 पर्यंत पूर्ण करण्याचे शासनाचे निर्देश आहेत. या प्रकल्पासाठी पाणी, रस्ते, वीज या मूलभूत सुविधांसाठी ३०० कोटी मंजूर आहेत. या कामाच्या शुभारंभासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी यावे, यासाठी आमचा जोरदार पाठपुरावा आहे. फेब्रुवारीच्या पहिल्या आठवड्यात मुख्यमंत्री, उपमुख्यमंत्री या कार्यक्रमासाठी यावेत, यादृष्टीने पालकमंत्र्यांनी प्रयत्न करावेत, अशी अपेक्षा व्यक्त केली.

काँग्रेस काळापासून सुरू झालेला प्रकल्प भाजपामुळे पूर्ण

रे नगर गृहप्रकल्पाची सुरुवात केंद्रात व राज्यात काँग्रेसची सत्ता असताना झाली. सोनिया गांधी, शरद पवार, पृथ्वीराज चव्हाण यांच्याकडे अनेकदा गेलो, पण म्हणावा तसा प्रतिसाद मिळाला नाही. केंद्रात व राज्यात सत्ता परिवर्तन झाल्यावर देवेंद्र फडणवीसांनी या गृहप्रकल्पबाबत सर्व माहिती जाणून घेत सर्वतोपरी मदत करण्याचे आश्वासन दिले. पंतप्रधान नरेंद्र मोदीं देखील यावर विशेष लक्ष देऊन आहेत, असे आडम मास्तर बोलताना म्हणाले. सोनिया गांधी, शरद पवार यांना जमलं नाही ते मोदी व देवेंद्र फडणवीसांनी करून दाखवले, अशी स्तुतीसुमने आडम मास्तरांनी उधळली.