घाटकोपरमध्ये गतिमंद मुलीसोबत शौचालयात लैंगिक अत्याचार; तीन अल्पवयीन मुलांवर गुन्हा दाखल

मुंबई : एका अल्पवयीन गतिमंद मुलीवर तीन अल्पवयीन मुलांनी सामूहिक बलात्कार केल्याची घटना घाटकोपर येथे समोर आली आहे. ही मुलगी सार्वजनिक शौचालयात जात असताना, तीन मुलांनी तिला गाठले आणि जबरदस्तीने शौचालयात नेऊन तिच्यावर अत्याचार केला. धक्कादायक म्हणजे, शौचालयात तिच्यावर केलेल्या अत्याचाराचे चित्रीकरण करून त्यांनी तो व्हिडीओ सोशल मीडियावर व्हायरल केला. मुलीच्या वडिलांच्या तक्रारीवरून पोलिसांनी गुन्हा दखल करून तिन्ही आरोपींना ताब्यात घेऊन त्यांची रवानगी बालगृहात करण्यात आली.

अशी आहे घटना

घाकोपरच्या चिरागनगरमध्ये एका कुटुंबातील १७ वर्षांची मुलगी १३ जानेवारीला घराच्या परिसरात असलेल्या सार्वजनिक शौचालयात गेली होती. शौचालयातून बाहेर येताच ती रडू लागल्याने आजूबाजूच्या नागरिकांनी तिला हटकले. गतिमंद असल्याने तिला नीट सांगता येत नव्हते, म्हणून त्यांनी तिच्या भावाला बोलावले. त्यावेळी तिने येथील मुलांनी शौचालयात मारल्याचे सांगितले. नागरिकांनी तीन मुलांना पकडून ठेवत मुलीच्या वडिलांना बोलावून घेतले. तिन्ही मुलांचे पालक मुलीच्या वडिलांपुढे माफी मागून त्यांना सोडण्याची विनंती करू लागले. केवळ मारहाणीचे प्रकरण असल्याने मुलीच्या वडिलांनी तिन्ही मुलांना त्यांच्या पालकांच्या विनंतीनुसार सोडूनही दिले. मात्र, दोन दिवसांनी सोशल मीडियावर एक व्हिडीओ व्हायरल झाला. यामध्ये गतिमंद मुलीसोबत शौचालयात लैंगिक अत्याचार करीत असल्याचे दिसत होते. मुलीच्या वडिलांना ही बाब समजताच त्यांना धक्का बसला.

याबाबत त्यांनी मुलीला विश्वासात घेऊन विचारले. मात्र, तिला नीट सांगता येत नव्हते. परंतु व्हिडीओमध्ये तिच्यावर लैंगिक अत्याचार केल्याचे स्पष्ट दिसत होते. यावरून मुलीच्या वडिलांनी घाटकोपर पोलिस ठाणे गाठून तीन अल्पवयीन मुलांविरुद्ध तक्रार केली. या तक्रारीवरून घाटकोपर पोलिसांनी बलात्कार, माहिती तंत्रज्ञान कायद्यांतर्गत गुन्हा दाखल करून तिघांना ताब्यात घेतले. अल्पवयीन असल्याने तिन्ही मुलांची रवानगी बालगृहात करण्यात आल्याची माहिती घाटकोपर पोलिसांनी दिली.