Tej Police Times
मुंबई : सध्या मनोरंजन विश्वामध्ये सर्वाधिक चर्चा आहे ती शाहरुख खान आणि त्याच्या पठाण सिनेमाची. तब्बल चार वर्षांच्या प्रदीर्घ कालावधीनंतर शाहरुख खान पठाण सिनेमाच्या माध्यमातून पुन्हा एकदा मोठ्या पडद्यावरून चाहत्यांच्या भेटीला आला आहे. चाहत्यांमध्येदेखील शाहरुखची क्रेझ आहे. त्यामुळेच काही चाहत्यांनी तर शाहरुखचे मोठमोठे कटआऊट लावले आहेत.
शाहरुख खाननं ट्विटरवर एक फोटो शेअर केला आहे. त्यात पठाण सिनमेाच्या तिकीटांचा ढिग दिसत आहे. शाहरुख खाननं हा फोटो शेअर करत लिहिलं की, ‘अरे वाह! प्लीज सिनेमा पाहिल्यानंतर वापरलेल्या तिकिटांची योग्य ती विल्हेवाट लावा… थँक यू’
पठाण सिनेमा काही ठिकाणी सिंगल थिएटर्समध्येही लागला आहे. त्यासाठी शाहरुखनं त्यांचं अभिनंदन केलं. त्याने लिहिलं की, ‘लहानपणापासून सर्व सिनेमे सिंगल स्क्रीनवर पाहिले आहेत. त्यातच खरी मजा असते. माझ्या सिनेमाला यश मिळो यासाठी तुम्ही सगळ्यांनी प्रार्थना करा.’
चेन्नईमध्ये शाहरुखचं एक भलंमोठं आणि उंच पोस्टर लावलं आहे. त्याचा व्हिडिओ शाहरुखच्या चाहत्यानं शेअर केला आहे. तो रिशेअर करत शाहरुखनं लिहिलं आहे की, ‘इतक्या उंचीवरून मला तर भीती वाटते. तुम्ही सिनेमा बघा आणि सांगा कसा वाटला ते…’
शाहरुखला एका चाहत्यानं विचारलं की हा सिनेमा कुटुंबासोबत पाहू शकतो का? त्यावर अभिनेत्यानं म्हटलं की, ‘मी देखील हा सिनेमा कुटुंबासोबत पाहिला. त्यामुळे मला वाटतं की तुम्हीदेखील तो कुटुंबासोबत पाहू शकता.’
दरम्यान, शाहरुख खानचा पठाण सिनेमा २५ जानेवारीला प्रदर्शित झाला. सिनेमा पाहण्यासाठी प्रेक्षकांनी चित्रपटगृहामध्ये गर्दी केली. सिनेमाबाबत ट्विटरवर नेटककरी विविध प्रकारच्या कमेन्ट करत आहेत. शाहरुख आणि त्याच्या सिनेमाबाबत त्यांनी मत व्यक्त करायला सुरुवात केली आहे. सिनेमाचं अॅडव्हान्स बुकींगमधून ५० कोटी रुपये जमा झाले आहेत.