Tej Police Times
मुंबई– लोकप्रिय मराठमोळी अभिनेत्री तेजस्विनी पंडित सध्या तिच्या ‘बांबू’ चित्रपटामुळे प्रचंड चर्चेत आहे. तिने आपल्या सौंदर्याने आणि उत्कृष्ट अभिनयशैलीने प्रेक्षकांच्या मनात वेगळं स्थान निर्माण केलं. तिने आपल्या भूमिकांमधून प्रेक्षकांची मनं जिंकली. मराठी चित्रपटसृष्टीमधील सर्वोत्कृष्ट अभिनेत्रींमध्ये तेजस्विनीचं नाव घेतलं जातं. मात्र काही वर्षांपूर्वी तेजस्विनीबद्दल एक अफवा पसरली होती. मराठी चित्रपटसृष्टीमधील सर्वाधिक लोकप्रिय दिग्दर्शक संजय जाधव याच्यासोबत तेजस्विनीचं अफेअर असल्याचं म्हटलं गेलं. संजय आणि तेजस्विनी यांनी अनेक चित्रपट सोबत केले. संजयच्या प्रत्येक चित्रपटात तेजस्विनी असतेच असं म्हणत ते दोघे रिलेशनशिपमध्ये आहेत असं पसरवलं गेलं. आता नुकत्याच दिलेल्या एका मुलाखतीत तेजस्विनीने यावर भाष्य केलं आहे.
प्लॅनेट मराठीच्या नव्याने सुरू झालेल्या ‘पटलं तर घ्या’ कार्यक्रमात तेजस्विनीने हजेरी लावली होती. कार्यक्रमात तिला तिच्या आयुष्यातील सगळ्यात चांगल्या आणि वाईट अफेवेबद्दल विचारणा करण्यात आली. तेव्हा बोलताना तेजस्विनी म्हणाली, ‘माझं आणि संजय जाधव याचं अफेअर आहे ही माझ्याबद्दल पसरलेली सगळ्यात वाईट अफवा होती. माझ्यासाठी ही गोष्ट अनपेक्षित होती. संजय दादा आणि माझं अफेअर आहे हे ऐकणं माझ्यासाठी वाईट होतं. कारण मी त्याला दादा म्हणते. तो माझा दादा आहे. आम्ही दोघेही खूप घट्ट आहोत. आमच्यातलं नातं खूप घट्ट आहे. दादा मला त्याच्या मुलीसारखी वागणूक देतो. तो माझ्यात आणि त्याची मुलगी द्वितीमध्ये मुळीच फरक करत नाही. तो मला त्याच्या मुलीप्रमाणे वागणूक देतो. त्यामुळे आमच्या नात्याबद्दल पसरलेली ही अफवा खरंच वाईट होती.’
संजय आणि तेजस्विनी यांनी ‘तू ही रे’, ‘अगं बाई अरेच्चा’, ‘ये रे ये रे पैसा’, ‘अनुराधा’ यांसारख्या चित्रपटात आणि वेबसीरीजमध्ये काम केलं आहे. तेजस्विनीचा ‘बांबू’ हा चित्रपट २६ जानेवारी रोजी प्रेक्षकांच्या भेटीला आला आहे. या चित्रपटात अभिनय बेर्डे, वैष्णवी कल्याणकर, पार्थ भालेराव यांच्या मुख्य भूमिका आहेत. सोबतच तेजस्विनीदेखील खास भूमिकेत दिसतेय.