Tej Police Times
अहमदनगर : विधान परिषदेच्या नाशिक पदवीधर मतदारसंघातील अपक्ष उमेदवार सत्यजीत तांबे यांच्यासंबंधी ज्येष्ठ नेते बाळासाहेब थोरात यांची भूमिका काय? याबद्दल प्रदेशाध्यक्ष नाना पटोले यांनी महत्वाचे विधान केले आहे. यासंबंधी पत्रकारांनी विचारलेल्या प्रश्नाला उत्तर देताना पटोले म्हणाले, “बाळासाहेब थोरात हे पक्षाचे ज्येष्ठ नेते आहेत. ते माझेही नेते आहेत. त्यामुळे मी त्यांना आदेश देऊ शकत नाही. मात्र, त्यांच्याशी झालेल्या बोलण्यानुसार ते पक्षासोबतच आहेत”, असे पटोले म्हणाले. या मतदारसंघात भाजपने तांबे यांना आतून पाठिंबा दिल्याचे समोर आले असताना काँग्रेसकडूनही आता थोरात यांची भूमिका अशा पद्धतीने स्पष्ट करण्यात आली आहे. मात्र, स्वत: थोरात यांनी मात्र अद्याप यावर काहीही भाष्य केलेले नाही.
बैठकीनंतर पटोले यांनी प्रसार माध्यमांशी संवाद साधला. ते म्हणाले, “डॉ. सुधीर तांबे आणि सत्यजीत तांबे यांच्यासंबंधी आणि त्यानंतर त्यांना पाठिंबा देणाऱ्यांसंबंधी निर्णय घेताना पक्षाची काहीही चूक झालेली नाही. पक्षाचे नियम आणि शिस्तीप्रमाणेच सर्व प्रक्रिया झाली आहे. तांबे यांना भाजपचा पाठिंबा असणार याची कुणकुण आधीच लागली होती. आता भाजपने पाठिंबा दिला की नाही, हे मला माहिती नाही. थोरात सध्या आजारी असल्याने रुग्णालयात आहेत. त्यामुळे ते जाहीरपणे भूमिका मांडू शकत नसतील. मात्र, माझे त्यांच्याशी जे बोलणे झाले, त्यानुसार ते पक्षासोबत असल्याचे त्यांनी स्पष्ट केले आहे. ते पक्षाचे ज्येष्ठ नेते आहेत. त्यामुळे त्यांना मी आदेश देऊ शकत नाही. त्यांनीच पक्षाची भूमिका समजावून घेऊन तशी कृती करणे अपेक्षित आहे. तसे ते करतील असे मला वाटते. जे कोणी पक्षाच्या विरोधात भूमिका घेतील, त्यांच्यावर कारवाई केली जाणारच. तशी ती करण्यात आली आहे. त्यामुळेच नगरच्या जिल्हाध्यक्षाला निलंबित आणि कार्यकारिणी बरखास्त करण्यात आली आहे. लवकरच नवीन कार्यकारिणी जाहीर केली जाणार आहे” असेही पटोले म्हणाले.
भाजपसंबंधी पटोले म्हणाले, या मतदारसंघात केवळ काँग्रेसलाच प्रश्न विचारले जात आहेत. भाजपला का त्यांची भूमिका विचारली जात नाही? त्यांनी या निवडणुकीत उमेदवार का दिला नाही? पाच जिल्ह्यांत त्यांना कोणीही लायक उमेदवार मिळाला नाही का? त्यांना तांबेंना उमेदवारी द्यायची होती तर ती का दिली नाही? आताही उघड पाठिंबा का जाहीर करीत नाहीत? याची उत्तरे जनतेला मिळाली पाहिजेत. भाजपने तांबे यांना उघड पाठिंबा दिला तर त्याचे आम्ही स्वागतच करतो” असेही पटोले म्हणाले.
‘वंचित’ची युती शिवसेनेसोबत : पटोले
वंचित बहुजन आघाडी महाविकास आघाडीसोबत आल्यानंतरही नाशिक पदवीधर मतदारसंघातील वंचितचा उमेदवार कायम आहे, यासंबंधी विचारले असता पटोले म्हणाले, “आम्ही आधीपासून सांगत आहोत की वंचितची युती शिवसेनेसोबत झाली आहे. त्यांच्या यासंबंधीच्या बैठकांना किंवा घोषणेच्यावेळीही आम्ही उपस्थित नव्हतो. त्यामुळे वंचितला महाविकास आघाडीचा घटक म्हणता येणार नाही. त्यामुळे त्यांच्या उमेदवारासंबंधी शिवसेनेने ठरवायचे आहे”, असेही पटोले म्हणाले.